کرسی رہے ناں رہے پارلیمان کے وقارکیلئے کوشش کرتارہوں گا، صادق سنجرانی

اسلام آباد: چیئرمین سینیٹ صادق سنجرانی نے قائد حزب اختلاف راجا ظفرا لحق کی تجویز پر سینیٹ اجلاس غیر معینہ مدت کے لیے ملتوی کردیا۔ راجا ظفرا لحق نے کہاکہ چاہتے ہیں تحریک عدم اعتماد کی قرارداد صدرمملکت کے بلائے گئے اجلاس میں لائی جائے۔

چیئرمین سینیٹ کہتے ہیں، ہمیشہ عہدے کا تقدس اور غیرجانبداری کا خیال رکھا، کرسی نہ رہی پھر بھی پارلیمان کے وقارکیلئے کوشش کرتارہوں گا۔

چیئرمین سینیٹ کی زیرصدارت ایوان بالا کا اجلاس پارلیمنٹ ہاؤس اسلام آباد میں ہوا، قائد حزب اختلاف راجا ظفرا لحق نے کہاکہ اپوزیشن سینیٹ رولز 218 کے تحت قرارداد پر بحث میں حصہ نہیں لینا چاہتی، لہذا آج کا اجلاس بغیر کارروائی ملتوی کیا جائے۔

انہوں نے کہا کہ چاہتے ہیں صدرمملکت کے بلائے گئے اجلاس میں تحریک عدم اعتماد کی قرارداد لائی جائے۔ چیئرمین سینیٹ نے اپوزیشن لیڈر کا موقف سننے کے بعد سینیٹ اجلاس غیرمعینہ مدت کیلئے ملتوی کردیا۔

چیئرمین سینیٹ صادق سنجرانی نے رولنگ میں کہاکہ چیئرمین یا ڈپٹی چیئرمین کوہٹانے کیلئے نوٹس صرف جاری اجلاس میں دیاجاسکتا ہے۔چیئرمین سینیٹ کو ہٹانے کی قرارداد کا نوٹس شرائط پر پورا نہیں اترتا۔

رولنگ میں کہا گیا ہے کہ  ہمیشہ عہدے کا تقدس اور غیرجانبداری کا خیال رکھا، سینیٹ کے رکن کے طور پربھی پارلیمان کے وقارکیلئے کوشش کرتارہوں گا۔

دوسری جانب قائد ایوان شبلی فراز نےحکومتی سینیٹرز کے اعزاز میں ظہرانہ د یا ان کاکہنا تھا کہ سینیٹرز کی اکثریت حکومت کے ساتھ ہے،بی این پی مینگل اور مسلم لیگ فنکشنل کے کسی رکن نے ظہرا نے میں شرکت نہیں کی۔