سزا یافتہ افراد ٹی وی پرآکر قوم کو گمراہ اورخود کو سیاسی شہید بنارہے ہیں،عمران خان

اسلام آباد: حکومت نے اپوزیشن کے احتجاج پر سخت ردعمل دینے کا فیصلہ کیا ہے، وزیراعظم عمران خان کہتے ہیں کرپشن کیسز میں سزا یافتہ افراد ٹی وی پر آکر قوم کو گمراہ  اور خود کو سیاسی شہید بنا رہے ہیں۔

وزیراعظم عمران خان کی زیرصدارت حکومتی ترجمانوں کا اجلاس اسلام آباد میں ہوا، جس میں وزیراعظم کے دورہ امریکہ پر چیئرمین سینیٹ صادق سنجرانی کیخلاف اپوزیشن کی تحریک عدم اعتماد اور ایوان بالا میں نمبر گیم سے متعلق امور پر بات چیت کی گئی۔

 ذرائع کا کہنا ہے کہ حکومت نے اپوزیشن کے احتجاج پر سخت ردعمل دینے کا فیصلہ کیا ہے، اس مقصد کے لئے وزیراعظم نے حکومتی ترجمانوں کو اہم ہدایات جاری کیں۔

 ذرائع کے مطابق وزیراعظم عمران خان کا کہنا تھا کہ ترجمان حکومت کا مثبت چہرہ عوام کے سامنے لائیں،انہوں نے کہا کہ احتساب کا عمل بلاتفریق جاری رہے گا،معاشی بحران سے نکل آئے، اشیائے ضرورت میں ہر ممکن ریلیف دے رہے ہیں۔

 وزیراعظم عمران خان نے کہا کہ کرپشن کیسز میں سزا یافتہ افراد ٹی وی پر آ کر قوم کو گمراہ  کر کے خود کو سیاسی شہید بنا رہے ہیں۔