علاقائی امن کے لئے پاکستانی قربانیوں کا تسلسل، پاک فوج کے کیپٹن سمیت 10 جوان شہید

راولپنڈی: ملک میں قیام امن کے لئے پاک فوج کے کیپٹن اور حوالدار سمیت 10 جوان شہید ہو گئے۔ ڈی جی آئی ایس پی آر میجر جنرل آصف غفور کا کہنا ہے کہ شمالی وزیرستان اور بلوچستان میں پاک فوج کے جوانوں کی شہادت علاقائی امن کے لیے پاکستانی کوششوں کا تسلسل ہے۔

پاکستان اور خطے میں امن و استحکام کے لئے پاک فوج کی جانب سے قربانیوں کا سلسلہ جاری ہے،شمالی وزیرستان اور بلوچستان میں پیش آنے والے دو الگ الگ واقعات میں کیپٹن اور حوالدار سمیت 10جوان مادر وطن پر قربان ہو گئے۔

ڈی جی آئی ایس پی آر میجر جنرل آصف غفور کا کہنا ہے کہ شمالی وزیرستان میں پاک افغان سرحد پر6 اوربلوچستان میں 4 فوجی جوان شہید ہوئے، قربانیاں پاکستان کی طرف سے خطے میں امن قائم کرنے کےلیے ہیں۔

Shahadat of 6 sldrs on Pak-Afg Bdr & 4 in Bln is the sacrifice Pakistan making for peace in the region. While security of tribal areas has been improved with efforts now focused to solidify border, inimical forces are attempting to destabilise Bln. Their efforts shall IA fail.

— DG ISPR (@OfficialDGISPR) July 27, 2019

سماجی رابطے کی ویب سائٹ پر جاری بیان میں میجر جنرل آصف غفور کا کہنا تھا کہ قبائلی علاقوں میں کوششوں کے بعد سیکیورٹی صورتحال بہتر ہوگئی، اب تمام توجہ سرحدوں کو محفوظ بنانے کےلیے ہے۔ دشمن قوتیں بلوچستان کوغیرمستحکم کرنے کی کوشش کررہی ہیں، ان شاء اللہ دشمن قوتوں کی کوششیں ناکام ہوں گی۔

پاک فوج کے شعبہ تعلقات عامہ کے مطابق پہلے واقعہ میں شمالی وزیرستان کے علاقے گرباز میں دہشت گردوں نے افغانستان کے علاقے سے سرحدی گشت پر مامور پاک فوج کی ٹیم پر فائرنگ کی، جس کے نتیجے میں حوالدار سمیت 6 جوان شہید ہو گئے۔ شہید ہونے والوں میں سپاہی نوید، بچل، علی رضا، محمد بابر اور احسن شامل ہیں۔

آئی ایس پی آر کے مطابق دوسرا واقعہ بلوچستان میں پیش آیا، تربت اور ہوشاب میں امن دشمنوں کی موجودگی کی اطلاع پر کومبنگ آپریشن کیا گیا، دہشت گردوں کے ساتھ لڑتے ہوئے کیپٹن عاقب اور تین جوان مادر وطن پر قربان ہو گئے،  کیپٹن عاقب کا تعلق سرگودھا کی تحصیل بھلوال سے ہے، شہید ہونے والے سپاہیوں میں صوابی کے نادرحسین، باغ آزاد کشمیر کے عاطف الطاف اور حفیظ اللہ سے تعلق رکھنے والے حفیظ اللہ شامل ہیں۔