امریکی نائب وزیرخارجہ ایلیس ویلز کا وفد کے ہمراہ دورہ پاکستان

اسلام آباد: امریکی نائب معاون وزیرخارجہ ایلیس ویلز اعلیٰ سطح امریکی وفد کے ہمراہ پانچ روزہ دورہ پر پاکستان پہنچ گئی ہیں۔ پاکستان بھارت کی جانب سے مقبوضہ کشمیر میں اٹھائے گئے حالیہ اقدامات کو مسترد کئے جانے سے متعلق امریکی وفد کو آگاہ کرے گا۔

سفارتی ذرائع کے مطابق امریکی نائب معاون وزیر خارجہ الیس ویلز رات گئے پانچ روزہ دورہ پر پاکستان پہنچیں ہیں۔ ان کے ہمراہ ایک اعلیٰ سطح امریکی وفد بھی ہے۔ ایلیس ویلز کے دورے میں سول اور عسکری قیادت سے ملاقاتیں اور وزارت خارجہ میں وفود کی سطح پر مذاکرات میں حصہ لیں گی۔

ذرائع کا کہنا ہے کہ بھارت کی جانب سے مقبوضہ کشمیر میں اٹھائے گئے حالیہ اقدامات کو مسترد کئے جانے سے متعلق امریکی وفد کو آگاہ کیا جائے گا۔ بھارتی اقدامات سے خطے کے امن وسلامتی کو درپیش خطرات بارے بات ہوگی۔ پاکستان لائن آف کنٹرول پر بھارت کی جانب سے کلسٹر بموں کے استعمال کے معاملہ کو بھی اٹھائے گا۔

ذرائع کا کہنا ہے کہ افغان مفاہمتی عمل پر پیشرفت پر کلیدی گفتگو ہو گی،علاقائی امن و سلامتی کے امور زیر غور آئیں گے۔ الیس ویلز کے دورے کا مقصد پاک، امریکا تعلقات کو مستحکم کرنا ہے۔