پاکستان بھارت کیلئے فضائی حدود اورتجارتی راستے مکمل بند کرنے پرغور کررہا ہے، فواد چوہدری

اسلام آباد: وفاقی وزیرسائنس اینڈ ٹیکنالوجی فواد چوہدری کا کہنا ہے کہ مقبوضہ کشمیر میں مودی سرکار کے غاصبانہ اقدامات اور ہٹ دھرمی پر بھارت کے لیے پاکستان کی فضائی حدود اور تجارتی راستے مکمل طور پر بند کرنے پر غور کیا جا رہا ہے۔

سماجی رابطے کی ویب سائٹ پر جاری ایک بیان میں فواد چوہدری نے کہا کہ وزیراعظم عمران خان بھارت کے لیے پاکستانی فضائی حدود اور پاکستان کے ذریعے افغانستان سے تجارت کا زمینی راستہ مکمل طور پر بند کرنے پر غور کر رہے ہیں۔

فواد چوہدری نے کہا ہے کہ یہ تجاویز کابینہ کے اجلاس میں پیش کی گئیں، جن پر عمل درآمد کے لیے قانونی امور کا جائزہ لیا جارہا ہے۔ کشیدگی کا آغاز نریندر مودی نے کیا تھا اور ختم ہم کریں گے۔

واضح رہے کہ وفاقی کابینہ کے اجلاس کے دوران کابینہ ارکان نے بھارتی وزیراعظم نریندر مودی کو پاکستان کی فضائی حدود استعمال کرنے کی اجازت دینے پراعتراض کیا گیا جس پر وزیراعظم اور وزیرخارجہ نے کابینہ اراکین کو بین الاقوامی قوانین سے متعلق بریف کیا۔ کابینہ کو بتایا گیا کہ فضائی حدود استعمال پر پابندی عائد نہیں تھی اس لیے مودی نے پاکستانی فضائی حدود استعمال کی۔