کشمیر پرڈیل ہماری لاشوں سے گزرکرہوگی، آخری سانس تک کشمیریوں کیساتھ ہیں، ترجمان پاک فوج

راولپنڈی: پاک فوج کے ترجمان میجر جنرل آصف غفور نے ایک بار پھر ہرقیمت کشمیریوں کی مکمل حمایت جاری رکھنے اور کشمیر کے معاملے پر ہرحد تک جانے کے عزم کا اعادہ کیا ہے۔ ان کا کہنا ہے کہ آخری جوان، آخری گولی اور آخری سانس تک کشمیریوں کے ساتھ کھڑے ہیں، کشمیر کے معاملے پر سودے بازی ہماری لاشوں سے گزر کر ہوگی۔

راولپنڈی میں مقبوضہ کشمیر اور علاقائی سلامتی سے متعلق پریس کانفرنس کے دوران پاک فوج کے شعبہ تعلقات عامہ کے ڈی جی میجر جنرل آصف غفور نے کہا کہ ہم جس خطے میں رہتے ہیں ہمیں وہاں کے حالات کو سمجھنے کی ضرورت ہے، عالمی طاقتوں کے مفادات اس خطے سے وابستہ ہیں اور پاکستان کو نظرانداز کر کے عالمی طاقتوں کے مفادات پورے نہیں ہو سکتے۔

کشمیر کے معاملے پر بات کرتے ہوئے میجر جنرل آصف غفور نے کہا کہ کشمیر بین الاقوامی طور پر تسلیم شدہ تنازع ہے لیکن بھارت نے مقبوضہ کشمیرمیں انسانی حقوق کی خلاف ورزیاں تیز کر دی ہیں۔ انہوں نے کہا کہ کشمیریوں کی نسل کشی کی جا رہی ہے اور بھارت کے اپوزیشن رہنما کو مقبوضہ کشمیر بھی جانے سے روک دیا گیا، بھارت چاہتا ہے کہ مقبوضہ کشمیر کی ڈیموگرافی ایسی بدلی جائے کہ مسلمانوں کا وہاں رہنا مشکل ہو جائے۔

    بھارت مقبوضہ کشمیر میں ایک نئی جنگ کا بیج بو رہا ہے، ترجمان پاک فوج

ڈی جی آئی ایس پی آر نے کہا کہ دو نیوکلیئر طاقتوں کے درمیان جنگ کی گنجائش نہیں ہوتی لیکن مقبوضہ کشمیر میں جو بھارت نے کیا ہے وہ ایک نئی جنگ کا بیج بو رہا ہے، جنگیں صرف ہتھیاروں اور معیشت سے نہیں لڑی جاتیں۔ان کا کہنا ہے کہ مقبوضہ کشمیر کا حل اقوام متحدہ کی قراردادوں میں ہے اور ہم پاکستان نے ہمیشہ چاہا کہ مسئلہ کشمیر پُر امن طریقے سے حل ہو۔

انہوں نے کہا کہ وزیراعظم نے اپنی پہلی تقریر میں بھارت کو مذاکرات کی پیشکش کی لیکن پاکستان کی مخلصانہ مذاکرات کی پیشکش کے جواب میں بھارت نے جہاز بھیجے، بھارت کے بھیجے گئے جہاز کا کیا حال ہوا وہ سب آپ کے سامنے ہے۔ بھارت کی جانب سے کنٹرول لائن پر اشتعال انگیزی ہو سکتی ہے لیکن بھارت کو 27 فروری کی حرکت یاد رکھنی چاہیے، بھارت نے کوئی حرکت دہرائی تو اسکوارڈن لیڈر حسن اور نعمان موجود ہیں۔

کشمیر پر سودے بازی ہماری لاشوں سے گزر کر ہوگی، میجرجنرل آصف غفور

ترجمان پاک فوج نے ایک بار پھر اس عزم کو دہرایا کہ کشمیر ہماری شہہ رگ ہے، بہادرکشمیریوں کو پیغام دینا چاہتے ہیں کہ ہم آپ کے ساتھ ہیں، کشمیر کے معاملے پر کسی ڈیل یا سودے بازی کا سوچ بھی کیسے سکتے ہیں۔ کشمیر کے معاملے پر کسی بھی انتہا تک جائیں گے، چاہیے اس کے لیے کوئی بھی قیمت ادا کرنی پڑے۔

 انہوں نے کہا کہ کشمیری بھائیوں اور بہنوں کو پیغام دینا چاہتا ہوں کہ ان کے لئے آخری جوان، آخری گولی اور آخری سانس تک ان کے ساتھ کھڑے ہیں۔ کشمیر پر صدر ٹرمپ اور وزیراعظم میں جو بھی بات ہوئی سامنے آئی، ہمیں اپنی لیڈر شپ پر اعتماد کرنا چاہیے، ہم 72 سال میں پیچھے نہیں ہٹے تو اب کیسے ہٹ سکتے ہیں۔

جوہری ہتھیار استعمال کرنے میں پہل کی کوئی پالیسی نہیں، ڈی جی آئی ایس پی آر

جوہری ہتھیاروں کے استعمال سے متعلق ایک سوال کے جواب میں ترجمان پاک فوج نے پاکستان کی جوہری ہتھیار استعمال کرنے میں پہل نہ کرنے کی کوئی پالیسی نہیں ہے۔میجر جنرل آصف غفور نے کہا کہ ہمارے ہتھیار دشمن کو باز رکھنے کے لیے ہیں، اس حوالے سے جو کچھ ہو گا وہ ریاست کی پالیسی کے مطابق ہو گا۔

ان کا کہنا تھا کہ جنگی حکمت عملی پریس کانفرنسز اور جلسوں میں نہیں بتائی جاتی، مسلح افواج اپنا کام کر رہی ہیں، ہمیں پتہ ہے کہ کب کیا کرنا ہے، عوام کو اپنی مسلح افواج پر اعتماد ہونا چاہیے کہ وہ ملکی دفاع کیلئے ہروقت تیار ہیں۔ بھارت کو سمجھنا چاہیے کہ ہم اسے ہی اصل خطرہ سمجھتے ہیں۔ مشرقی سرحد پر کچھ بھی ہوتا ہے ہماری ساری توجہ صرف ادھر ہی ہو گی، عوام چاہتی ہے کہ انہیں پتا چلے کیسے جواب دیا جائے گا۔

ہم نے افغانستان میں امن کے لیے اپنا بھرپور کردار ادا کیا، میجر جنرل آصف غفور

ترجمان پاک فوج نے کہا کہ ہمارا ایک پڑوسی افغانستان ہے جہاں 40 برس سے جنگ ہو رہی ہے، افغانستان والوں نے 40 برس میں جنگ، قربانیوں، اور شہادتوں کے سوا کچھ نہیں دیکھا، ہم نے افغانستان میں امن کے لیے اپنا بھروپور کردار ادا کیا اور ابھی جو امریکا اور طالبان کے درمیان مذاکرات ہوئے ہیں اس میں بھی پاکستان کا کردار ہے۔

ترجمان پاک فوج نے کہا کہ چین کی معیشت کا بھی خطے میں اہم کردار ہے جب کہ ایران کی بارڈر فورس کے ساتھ ہمارے تعلقات میں بہتری آئی ہے اور ایران کے ساتھ جڑی سرحد پر فینسنگ کی جا رہی ہے۔ اسرائیل کے ساتھ تعلقات کے حوالے سے پوچھے گئے سوال پر ڈی جی آئی ایس پی آر نے کہا کہ اسرائیل کے ساتھ تعلقات کا سوال ہی پیدا نہیں ہوتا، اس حوالے سے چلنے والی تمام خبریں من گھڑت ہیں۔

    آرمی چیف مدت ملازمت میں توسیع نہیں چاہتے تھے، ترجمان پاک فوج

ڈی جی آئی ایس پی آر نے کہا کہ یہ تمام باتیں من گھڑت ہیں کہ آرمی چیف کی مدت ملازمت میں توسیع سے 125 جرنیلوں کی پروموشن رکی ہے، یہ سب یوٹیوب کی آوازیں ہیں، ایسا کچھ نہیں ہے، ایک کے بدلے ایک ہی پروموشن ہوتی ہے۔ ترجمان پاک فوج نے کہا کہ ہم ایک پیشہ ور فورس ہیں، حکم کی تعمیل اور سسٹم کے تحت کام کرتے ہیں، آرمی چیف جس طرف دیکھتے ہیں فوج اس طرف دیکھتی ہے۔