مغربی سرحد پردہشتگردی کے دو مختلف واقعات میں پاک فوج کے 4 جوان شہید، 1 زخمی، 2 دہشت گرد ہلاک

راولپنڈی: پاک فوج کے مزید چار جوان مادر وطن پر قربان ہو گئے، مغربی سرحد پر دہشت گردی کے دو مختلف واقعات میں سیکورٹی فورسز کے 4 اہلکار شہید جبکہ 1 زخمی ہوگیا۔ فائرنگ کے تبادلے میں 2 دہشت گرد ہلاک ہوئے۔

مسلح افواج کے شعبہ تعلقات عامہ ( آئی ایس پی آر) کے مطابق شمالی وزیرستان کے علاقے سپن وام میں ابا خیل کے قریب گزشتہ رات سیکورٹی فورسز کی پٹرولنگ پارٹی پر دہشت گردوں نے حملہ کیا جس کے نتیجے میں بلتستان سے تعلق رکھنے والے23 سالہ سپاہی اخترحسین شہید ہوئے۔

آئی ایس پی آر کے مطابق دہشت گردی کا دوسرا دیر کے علاقے میں پیش آیا جہاں پر پاک افغان بارڈر پر سرحدی باڑ لگانے میں مصروف پاک فوج کے جوانوں پر افغانستان سے دہشت گردوں نے فائرنگ کی۔ جس کے نتیجے میں پاک فوج کے 3 جوان شہید ہوئے جبکہ ایک زخمی ہوا۔

آئی ایس پی آر کے مطابق شہید ہونے والوں میں ضلع خیبر سے تعلق رکھنےوالے 28 سالہ لانس نائیک سید امین آفریدی، مانسہرہ سے تعلق رکھنےوالے 31 سالہ لانس نائیک محمد شعیب سواتی اور نوشہرہ سے تعلق رکھنے والے 22 سالہ سپاہی کاشف شامل ہیں۔