آزادی مارچ کو روکا گیا تو پورا ملک میدان جنگ ہوگا، مولانا فضل الرحمان

پشاور: جے یو آئی (ف) کے سربراہ مولانا فضل الرحمان کا کہنا ہے کہ انسانی سیلاب سے حکمران تنکے کی طرح بہہ جائیں گے۔ آزادی مارچ کو روکا گیا تو پورا ملک میدان جنگ ہوگا، اسلام آباد پہلا پڑاؤ ڈالیں گے، بی اور سی پلان کی طرف بھی جائیں گے۔

 پشاور میں میڈیا سے گفتگو کرتے ہوئے مولانا فضل الرحمان کا کہنا تھا کہ ملک اس وقت معاشی لحاظ سے ڈوب رہا ہے، روزگار کے تمام مواقع ختم کر دیئے گئے، ہم نے عام آدمی اور پاکستان کی آواز بننا ہے، ایٹمی جنگ کی بات کر کے پاکستان کو کٹہرے میں کھڑا کر دیا، جنگ کی دھمکیوں پر آنا سفارتی ناکامی ہے، ہماری جنگ کا میدان پورا ملک ہوگا، یہ جنگ حکومت کے خاتمے پر ہی ختم ہوگی۔

جے یو آئی (ف) کے سربراہ نے کہا کہ صورتحال سے نمٹنے کیلئے حکمت عملی تبدیل کرتے رہیں گے، ملک میں کوئی حکومت نہیں، نئے انتخابات کی طرف جانے کا مطالبہ کریں گے، پورے ملک سے انسانوں کا سیلاب آ رہا ہے، حکومت تنکوں کی طرح بہہ جائے گی، تاجر برادری ناروا ٹیکسوں کی وجہ سے ہڑتال پر ہے، نااہل اور ناجائز حکومت کا جانا ٹھہر گیا ہے۔

مولانا فضل الرحمن نے مزید کہا گرفتاریوں کا کوئی ڈر نہیں، اس سے حالات مزید خراب ہوں گے، آصف زرداری ہمارے ساتھ ہیں، کہیں سے مایوسی نہیں، مدارس کا ایشو بڑھا کر حکومت عالمی سپورٹ لینا چاہتی ہے۔