سب کچھ ریموٹ کنٹرول سےچل رہا ہے،عوامی مدد سےکٹھ پتلی حکمرانوں کوبھگائیں گے، بلاول بھٹو

 اسلام کوٹ: پاکستان پیپلز پارٹی کے چیئرمین بلاول بھٹو زرداری نے کہا ہے کہ ملک میں عدالت، میڈیا اور پارلیمان سب ریموٹ کنٹرول سے چل رہے ہیں۔ عوام کی مدد سے کٹھ پتلی حکمرانوں کو بھگائیں گے۔

اسلام کوٹ میں جلسے سے خطاب کرتے ہوئے بلاول بھٹو زرداری کا کہنا تھا کہ آج بہت خوشی محسوس ہورہی ہے کہ تھر کی عوام سے مخاطب ہوں، اس دھرتی کو دنیا صحرائے تھرکے نام سے جانتی ہے، تھرامن و مہمان نوازی کے لیے مشہور ہے۔

چیئرمین پیپلزپارٹی نے کہا کہ اس ملک میں کوئی آئین نہیں تھا، عوام کے پاس حقوق نہیں تھے،شہید ذوالفقار بھٹو نے طاقت کا سرچشمہ عوام کو بنایا، جب ظالم ضیاء نے آمریت قائم کرکے قائد عوام کا عدالتی قتل کیا تو شہید بی بی اپنی عوام کی جدوجہد کے لیے عوام کی آواز بنیں

اپنی بات جاری رکھتے ہوئے بلاول بھٹو زرداری نے کہا کہ آج پھر ظالم، کٹھ پتلی، سلیکٹڈ اور آمریت کی پیداوار کا راج ہے، آج عوام کی حقوق صلب کئے جارہے ہیں، صوبوں کے حقوق چھینے جارہے ہیں، اب یہ کراچی پر قبضہ بھی کرنا چاہتے ہیں۔

ان کا کہنا تھا کہ یہ آپ کے حقوق پر سودا کرتے ہیں تاہم  میں نکلا ہوں ان کو گرانے کے لیے، عمران خان اور ان کے ساتھیوں کو ہٹانے کے لیے نکلا ہوں، عمران خان تو ظالم اور سندھ دشمن ہیں، یہ ستارے والے بھی دھرتی کے غدار ہیں۔

چیئرمین پیپلزپارٹی بلاول بھٹو کا کہنا تھا کہ یہ کٹھ پتلی ستارے والے، عمران خان کی پالیسی کا ساتھ دے رہے ہیں، اب جمہوریت خطرے میں ہے، آپ میرے ساتھ ہیں تو دنیا کی کوئی طاقت مجھے نہیں روک سکے گی، اس کٹھ پتلی کو گرائیں گے اور عوام کے مسائل کا حل نکالیں گے۔