بلاول بھٹو زرداری کا جے یو آئی کے حکومت مخالف دھرنے میں شرکت نہ کرنے کا اعلان

بہاولپور: پاکستان پیپلزپارٹی کے چیئرمین بلاول بھٹو زرداری نے حکومت مخالف احتجاجی دھرنے میں شرکت نہ کرنے کا ایک مرتبہ پھر اعلان کرتے ہوئے کہا کہ پہلے دن سے موقف ہے دھرنے میں شریک نہیں ہوں گے۔

بہاولپور میں میڈیا سے بات کرتے ہوئے بلاول بھٹو زرداری نے کہا کہ سلیکٹڈ حکومت ہر محاذ پر ناکام ہو رہی ہے، عوام کہہ رہے ہیں ناکام حکومت کا بوجھ ہم کیوں اٹھائیں اور فضل الرحمان نے نہیں کہا کہ وہ خود وزیراعظم ہاؤس جا کر انہیں گھسیٹیں گے بلکہ مولانا نے کہا لوگوں کے یہ جذبات ہیں۔

چیئرمین پیپلز پارٹی نے دھرنے میں شرکت کے حوالے سے اپنا موقف دہراتے ہوئے کہا کہ ’’پہلے دن سے ہمارا موقف ہے کہ دھرنے میں شریک نہیں ہوں گے البتہ کورکمیٹی نے کہا تو پیپلزپارٹی بھی دھرنے میں حصہ لے گی‘‘۔

بلاول بھٹو زرداری نے کہا کہ سانحہ تیز انتہائی افسوسناک اور بہت بڑا حادثہ ہے، ماضی میں عمران خان حادثات پر استعفوں کی بات کیا کرتے تھے، امید ہے وزیراعظم اپنے وعدے پورا کریں گے اور شیخ رشید کے دور میں ریلوے میں سب سے زیادہ حادثے ہوئے، وزیر ریلوے کو فی الفور استعفیٰ دینا چاہیے جب کہ حادثے کی تحقیقات ہونی چاہیں، امید ہے حکومت متاثرین کے مطالبات کو پورا کرے گی۔

چیئرمین پیپلز پارٹی کا کہنا تھا کہ کشمیر پر تاریخی حملہ ہوا ہے، عوام سمجھ رہے ہیں کشمیر پر سودا ہو گیا ہے، حکومت کو اپنی پالیسی واضح کرنی چاہیے، حکومت کو اپنی خارجہ پالیسی پر غور کرنا چاہیے، وزیراعظم کشمیریوں کے وکیل کا دعوی کرتے ہیں اور کرتار پور راہداری بھی کھول رہے ہیں۔