وزیراعظم کی گندم، آٹا اسمگلنگ میں ملوث سرکاری اہلکاروں کیخلاف کارروائی کی ہدایت

اسلام آباد: وزیراعظم عمران خان نے گندم و آٹے کی اسمگلنگ میں ملوث سرکاری اہلکاروں کے خلاف سخت کارروائی کی ہدایت کی ہے۔

وزیراعظم عمران خان کی زیرصدارت اشیائے ضروریہ کی قیمتوں کے حوالے سے اجلاس اسلام آباد میں ہوا جس میں آٹے، گھی، چینی و دیگر ضروری اشیا کی قیمتوں کو قابو میں رکھنے کے لئے اقدامات کا جائزہ لیا گیا۔ صوبائی چیف سیکرٹریز نے آٹے کی دستیابی اور قیمتوں سے متعلق وزیرِاعظم کو بریفنگ دی۔

وزیراعظم عمران خان نے ذخیرہ اندوزی اور ناجائز منافع خوری کے خاتمے کے لئے انتظامی اقدامات مزید موثر بنانے کی ہدایت کرتے ہوئے کہا کہ صوبائی انتظامیہ اشیاء ضروریہ کی قیمتوں میں اتار چڑھاؤ کی روزانہ اورہفتہ واررپورٹ بھجوائے۔

 انہوں نے کہا کہ گندم، آٹے اورفائن میدے کی اسمگلنگ کی روک تھام کے لئے بارڈر منیجمنٹ کو موثر بنایا جائے، اسمگلنگ میں ملوث عناصر اور انکی معاونت کرنے والے سرکاری اہلکاروں کے خلاف ایکشن لیا جائے۔

وزیراعظم نے کہا کہ ایکسل لوڈ پالیسی کو موخر کرنے کے بعد گھی کی قیمتوں میں کمی کو یقینی بنایا جائے، ضروری اشیاء کی قیمتوں کو قابو میں رکھنے کے لئے ہرممکنہ انتظامی ودیگر اقدامات کیے جائیں، ریاست کی ذمہ داری ہے ہر شہری کو اشیائے خورونوش کی دستیابی یقینی بنائے، ہر ممکن اقدامات اٹھائے جائیں تاکہ کوئی بھوکا نہ سوئے۔