حکمت عملی سے پیپلز پارٹی، ن لیگ کو دھرنے سے الگ کر دیا، شیخ رشید

راولپنڈی: حکومتی اتحادی جماعت عوامی مسلم لیگ کے سربراہ اور وزیر ریلوے شیخ رشید احمد کا کہنا ہے کہ حکومت نے اچھی حکمت عملی کے ذریعے مسلم لیگ (ن) اور پیپلزپارٹی کو دھرنے سے الگ کردیا۔

راولپنڈی میں میلاد النبیؐ کے حوالے سے منعقدہ تقریب میں شرکت کے بعد میڈیا سے گفتگو کرتے ہوئے شیخ رشید نے کہا کہ حکومت نے نوازشریف کو علاج کے لئے باہر جانے کی اجازت دی ہے، ان کی روانگی میں تاخیر کی وجہ نیب اور وزارت داخلہ کے درمیان کاغذی کارروائی ہے۔

شیخ رشید احمد نے کہا کہ حکومت نے اچھی حکمت عملی سے نون لیگ اور پیپلزپارٹی کو دھرنے سے الگ کر دیا، مولانا فضل الرحمان کے ساتھ لوگ نہیں ہیں، کراچی اور لاہور میں ناکام استقبال سے ان کی آنکھیں کھل جانی چاہئیں۔

وفاقی وزیر نے بات جاری رکھتے ہوئے کہا کہ ان (مولانا فضل الرحمان) کے مطالبات ناقابل قبول ہیں، ان کی ابتداء بھی غلط ہے انتہا بھی غلط ہوگی، وہ جب تک چاہیں بیٹھے رہیں، بے شک سال بیٹھے رہیں۔