کلبھوشن یادیوکو اپیل کاحق دینے کیلئے آرمی ایکٹ میں ترمیم نہیں کی جا رہی، ترجمان پاک فوج

راولپنڈی: ترجمان پاک فوج نے واضح کر دیا ہے کہ بھارتی جاسوس کل بھوشن کو اپیل کا حق دینے کے عالمی عدالت انصاف کے فیصلے پر عمل درآمد کے لیے آرمی ایکٹ میں ترمیم نہیں کی جا رہی۔

مسلح افواج کے شعبہ تعلقات عامہ (آئی ایس پی آر) کے مطابق میجر جنرل آصف غفور نے واضح کیا ہے کہ پاکستان میں دہشت گردی کرانے اور سینکڑوں معصوم شہریوں کے قاتل بھارتی جاسوس کمانڈر کلبھوشن یادیو سزا یافتہ مجرم ہے۔ دہشت گرد کلبھوشن یادیوسے متعلق عالمی عدالت انصاف کے فیصلے پر عمل درآمد کے لئے پاک آرمی ایکٹ میں ترمیم کی قیاس آرائیاں غلط ہیں۔

میجر جنرل آصف غفور کا کہنا ہے کہ کلبھوشن کیس میں نظرثانی سے متعلق قانونی پہلوؤں کا جائزہ لیا جا رہا ہے اور اس حوالے سے کسی بھی حتمی فیصلے کا اعلان جلد کیا جائے گا۔

واضح رہے کہ میڈیا پر یہ خبریں گردش کررہی تھیں کہ پاکستان میں دہشت گردی کی کارروائیوں میں ملوث بھارتی جاسوس کلبھوشن یادیو کو ہائیکورٹ میں اپیل کا حق دینے کے لئے آرمی ایکٹ میں ترمیم کا فیصلہ کیا گیا ہے اور اس حوالے سے حکومت نے ڈرافٹ بھی تیار کرلیا ہے۔