وفاقی حکومت نے مشرف کیخلاف غداری کیس کا فیصلہ رکوانے کیلئے عدالت سے رجوع کر لیا

اسلام آباد:  وفاقی حکومت نے سابق صدر جنرل (ر) پرویز مشرف کیخلاف سنگین غداری کیس کا فیصلہ رکوانے کے لئے اسلام آباد ہائی کورٹ سے رجوع کر لیا ہے۔ عدالت عالیہ کا تین رکنی بینچ منگل کو وزارت داخلہ کی درخواست پر سماعت کرے گا۔

سابق فوجی صدر پرویز مشرف کے خلاف شکایت کنندہ سیکرٹری داخلہ کی جانب سے ایڈیشنل ایڈووکیٹ جنرل طارق محمود کھوکھر نے درخواست اسلام آباد ہائی کورٹ میں دائر کی، جس میں موقف اپنایا گیا کہ ملزم پرویز مشرف کو صفائی کا موقع اور نئی پراسیکیوشن ٹیم کی تعیناتی تک خصوصی عدالت کو سنگین غداری کیس کا فیصلہ سنانے سے روکا جائے۔ اس کے ساتھ درخواست میں استدعا کی گئی ہے کہ خصوصی عدالت کا غداری کیس کا فیصلہ محفوظ کرنے کا حکم نامہ بھی معطل کیا جائے۔

اسلام آباد ہائی کورٹ نے سابق صدر پرویز مشرف  کے خلاف غداری کیس کا فیصلہ روکنے کے لیے حکومت کی درخواست پر سماعت کے لئے لارجر بینچ تشکیل دے دیا ہے۔چیف جسٹس اطہر من اللہ کی سربراہی میں قائم بینچ میں جسٹس عامر فاروق اور جسٹس محسن اختر کیانی شامل ہیں۔ جو منگل26 نومبر کو درخواست پر سماعت کرے گا۔

واضح رہے کہ خصوصی عدالت نے سابق صدر جنرل ریٹائرڈ پرویز مشرف کے خلاف سنگین غداری کیس کا فیصلہ 19 نومبر کو محفوظ کیا تھا جو 28 نومبر کو سنایا جائے گا۔