بھارتی سائبرسیکورٹی چیف نے بیانیے کی جنگ میں ڈی جی آئی ایس پی آر کی فتح تسلیم کرلی

نئی دلی: بھارتی سائبر سیکیورٹی کے سربراہ لیفٹیننٹ جنرل (ر) راجیش پنت کا کہنا ہے کہ بیانیے کی جنگ جیتنے کے لیے ڈی جی آئی ایس پی آر سے سیکھنے کی ضرورت ہے، اطلاعات کی جنگ میں پاکستانی ڈی جی آئی ایس پی آر کی بات کو دنیا بھر میں وزن دیا جاتا ہے۔

بھارتی سیکیورٹی ادارے پاکستانی مسلح افواج کے شعبہ تعلقات عامہ (آئی ایس پی آر) سے متاثر ہیں اور اس کا کھل کا اظہار کرنے پر مجبور ہیں۔ بھارتی سائبر سیکیورٹی چیف لیفٹیننٹ جنرل (ر) راجیش پنت نے اپنے ایک بیان میں کہا ہے کہ بھارت میں آئی ایس پی آر کی طرز کا ادارہ قائم کیا جائے اور پاکستان کی طرح تینوں بھارتی افواج کا ایک ترجمان ادارہ بنایا جائے۔

راجیش پنت نے بیانئے کی جنگ جیتنے کے لیے ڈی جی آئی ایس پی آر سے سیکھنے کا مشورہ دیتے ہوئے  کہا ہے کہ بھارتی افواج کے اپنے اپنے تعلقات عامہ کے شعبے ہیں جو مخالف سمت میں چل رہے ہیں، جدید جنگی حکمت عملی میں ڈی جی آئی ایس پی آر کی طرح ایک متفقہ بیانیے کی ضرورت ہے۔

ان کا کہنا تھا کہ بھارت کی تینوں مسلح افواج کے پبلسٹی ونگ اپنے اپنے راگ الاپ رہے ہوتے ہیں جب کہ پاکستان کا ایک آئی ایس پی آر مؤثر انداز میں بیانیہ دے رہا ہے، بھارتی فورسز بھی پاکستان کی طرح مشترکہ آئی ایس پی آر تشکیل دے کر بیانیہ پیش کرے۔

بھارتی سائبر سکیورٹی کے ادارے نے کہا ہے کہ پاکستانی مسلح افواج کا ترجمان ہر فورس کے اقدامات کی منظم ترجمانی کرتا ہے، اطلاعات کی جنگ میں پاکستانی ڈی جی آئی ایس پی آر کی بات کو وزن دیا جاتا ہے، پاکستانی ڈی جی آئی ایس پی آر کشمیر میں انسانی حقوق کی خلاف ورزیوں پر بات کرتے تو پورا یورپ ان کی بات کو توجہ دیتا ہے۔