وفاقی حکومت گرانے کیلئے بلاول بھٹو نے ایم کیو ایم سے مدد مانگ لی، صوبائی وزارتوں کی پیشکش

کراچی: چیئرمین پاکستان پیپلزپارٹی بلاول بھٹو زرداری کا کہنا ہے کہ متحدہ قومی موومنٹ (پاکستان) تحریک انصاف سے اتحاد ختم کر کے وفاقی حکومت گرانے کے لئے ساتھ دے، سندھ میں ایم کیو ایم کو وزارتیں دینے کیلئے تیار ہیں۔

کراچی میں میگا منصوبوں کی افتتاحی تقریب سے خطاب کرتے ہوئے چیئرمین پاکستان پیپلزپارٹی بلاول بھٹو زرداری نے کہا کہ ایم کیو ایم حکمران جماعت سے اتحاد ختم کرے، تحریک انصاف کی حکومت گرانے میں ساتھ دینے پر کراچی اور اس کے عوام کی خاطر جتنی وزارتیں وفاق میں ایم کیو ایم کے پاس ہیں ہم سندھ میں دینے کے لیے تیار ہیں، لیکن صرف شرط یہ ہے کہ عمران خان کو گھر بھیجیں۔

چیئرمین پیپلز پارٹی نے اپنی بات جاری رکھتے ہوئے کہا کہ صوبوں کے مطالبات پورے نہیں کیے جارہے جب کہ وفاق کی گیس پالیسی کی مذمت کرتے ہیں، گیس کے مسئلے پر سندھ کا حق مارا جارہاہے لہذا ہمیں وفاق سے اپنا حصہ چھیننا پڑے گا۔

بلاول بھٹو زرداری کا کہنا تھا کہ شہر قائد میں پورے پاکستان کے لوگ بستے ہیں، ہمارا کام نظر بھی آتا ہے اور ہم دکھا بھی سکتے ہیں، ملک کے عوام مسائل میں گھرے ہیں جب کہ معاشی حالات خطرناک صورتحال اختیار کرتے جا رہے ہیں اور غریب عوام کے مسائل میں دن بدن اضافہ ہورہا ہے۔

چیئرمین پیپلز پارٹی نے دعویٰ کیا کہ موجود حالات میں سندھ وہ واحد صوبہ ہے جہاں کام ہو رہا ہے، غیر ملکی جریدوں نے سندھ حکومت کی اس پالیسی کو سراہا ہے۔ ان کا کہنا تھا کہ بے نظیر اِنکم سپورٹ پروگرام سے 8 لاکھ لوگ نکالے گئے ہیں، سندھ حکومت اس معاملے کو عدالت میں چیلنج کرے، غریب سے ایک ہزار روپے چھیننے والے سیاستدانوں پر لعنت ہو۔

قبل ازیں بلاول بھٹو زرداری نے کراچی کے 4 منصوبوں کا افتتاح کیا جو ایک ارب 74 کروڑ روپے کی لاگت سے مکمل کیے گئے۔ جن میں کورنگی ڈھائی نمبر پر 33 کروڑ روپے جب کہ کورنگی 5 نمبر پر 33 کروڑ 40 لاکھ روپے کی لاگت سے پلوں کی تعمیر کی گئی۔ اسی طرح حیدر علی انڈر پاس کی تعمیر پر 66 کروڑ روپے خرچ کئے گئے جبکہ کینٹ سٹیشن کے اطراف سڑکوں کی تعمیرات پر 42 کروڑ روپے کے اخراجات آئے۔