جوابی کارروائی کافی نہیں تھی، ہم بدلہ لےکر امریکا کےمنہ پرتھپڑمارا، آیت اللہ خامنہ ای

تہران: ایران کے سپریم کمانڈر آیت اللہ خامنہ ای کا کہنا ہے کہ سلیمانی کی شہادت نے ایرانی قوم کو دنیا کے غنڈوں کے خلاف متحد کر دیا ہے۔ جوابی کارروائی کافی نہیں تھی، بدلہ لے کر امریکا کے منہ پر تھپڑ مارا ہے۔

سپریم لیڈر آیت اللہ خامنہ ای نے ایرانی قوم سے اپنے خطاب میں جنرل قاسم سلیمانی کو ایران کا بہادر سپوت قرار دیتے ہوئے کہا کہ وہ صرف فوجی نہیں، سیاسی میدان میں بھی جرات کا مظاہرہ کرتے تھے، انہوں نے اپنی زندگی کو لاحق خطرات کے باوجود ہمیشہ دوسروں کی جان کی پروا کی،سلیمانی کی شہادت نے ایرانی قوم کو دنیا کے غنڈوں کے خلاف متحد کر دیا ہے۔

آیت اللہ خامنہ ای نے کہا کہ امریکا چاہتا ہے عراق بھی سعودی عرب کی طرح دودھ دینے والی گائے بن جائے، جنرل سلیمانی نے عراق اور شام میں امریکا کے منصوبوں کو ناکام بنایا۔ سلیمانی کی شہادت نے ہمیں جگا دیا ہے، دنیا ہمارے جاہ وجلال کو دیکھ چکی ہے،گزشتہ رات ہم نے بدلہ لیکر امریکا کے منہ پر تھپڑ مارا لیکن صرف فوجی کارروائی کافی نہیں ہے۔

ایران کے مذہبی پیشوا نے کہا کہ یہ بہت ضروری ہے کہ ہم اپنے دشمن اور اس کے منصوبوں کو پہچانیں، ہمیں دشمن کا مقابلہ کرنے کیلئے خود کو سیاسی،سائنسی اور دفاعی میدان میں تیار کرنا چاہیے۔ انہوں نے کہا کہ ہمارا دشمن امریکا اور یہودی ریاست ہے اور ہمیں انہیں پہچاننے میں کوئی غلطی نہیں کرنی چاہیے کیونکہ دشمن ہمارے اندر شکوک پیدا کر کے ہماری دفاعی طاقت کو متاثر کرنا چاہتا ہے۔

واضح رہے کہ 3 جنوری کو امریکا نے عراق کے دارالحکومت بغداد میں ائیرپورٹ کے قریب راکٹ حملہ کر کے ایران کی القدس فورس کے کمانڈر میجر جنرل قاسم سلیمانی کو ہلاک کر دیا تھا، ایران نے جنرل قاسم سلیمانی کے قتل کا بدلہ لینے کا اعلان کرتے ہوئے تاریخی شہر قم کی جمکران مسجد میں انتقام کی علامت والا سرخ پرچم بھی لہرا دیا تھا۔

گزشتہ روز ایران نے عراق میں دو امریکی فوجی اڈوں پر راکٹوں سے حملہ کر کے امریکی فوج کا بھاری جانی و مالی نقصان ہونے کا دعویٰ کیا ہے۔