نوازشریف کی لندن کے ریسٹورنٹ میں ناشتے کی تصویر وائرل، فواد چوہدری کا طنز

لاہور: علاج کے لئے برطانیہ میں موجود سابق وزیراعظم نواز شریف کی لندن کے مہنگے ترین ریسٹورنٹ میں ناشتے کی میز پر تصویر سوشل میڈیا پر موضوع بحث بنی ہوئی ہے، وفاقی وزیر برائے سائنس اینڈ ٹیکنالوج فواد چوہدری کا کہنا ہے کہ کھاؤ پیو بیماری کے تمام مریض بہتر محسوس کر رہے ہیں۔

 سابق وزیراعظم میاں محمد نواز شریف اس تصویر میں اپنے صاحبزادے حسن نواز، بھائی شہباز شریف، بھتیجے سلمان شہباز اور سمدھی اسحاق ڈار کے ساتھ لندن کے ایک ریستوران میں بیٹھے نظر آ رہے ہیں۔ شریف فیملی ذرائع کا کہنا ہے کہ نواز شریف ڈاکٹرز کی ہدایات کے مطابق اپنے اہلخانہ کے ہمراہ چہل قدمی کیلئے باہر گئے تھے۔

دوسری جانب سابق وزیراعظم کی ریسٹورنٹ میں لی گئی تصویر وائرل ہونے کے بعد پنجاب حکومت نے معاملے کا نوٹس لے لبا ہے، صوبائی وزیرصحت ڈاکٹر یاسمین راشد نے نواز شریف کے ذاتی معالج سے رابطہ کر کے سابق وزیراعظم کے علاج سے متعلق فصیلات طلب کی ہیں۔

ادھر وفاقی وزیر برائے سائنس وٹیکنالوجی فواد چودھری نے نواز شریف کی تصویر وائرل ہونے پر تبصرہ کرتے ہوئے کہا ہے کہ لندن کے ہسپتال کے انتہائی نگہداشت یونٹ میں ہونیوالی ملاقات کے مناظر۔۔۔۔ کھاؤ پیو بیماری کا علاج انتہائی انہماک سے جاری ہے اور سارے مریض بہتر محسوس کر رہے ہیں۔

لندن کے ھسپتال کے انتہائ نگہداشت یونٹ میں ہونیوالی ملاقات کے مناظر۔۔۔ کھاؤ پیو بیماری کا علاج انتہائ انہماک سے جاری ہے اور سارے مریض بہتر محسوس کر رہے ہیں۔ pic.twitter.com/pl6Z2hlXw6

— Ch Fawad Hussain (@fawadchaudhry) January 13, 2020

خیال رہے کہ پنجاب حکومت جو کہ نواز شریف کے علاج اور ضمانت کے معاملے میں براہ راست فریق ہے۔ مسلم لیگ (ن) کی قیادت نے ضمانت کی مدت میں توسیع کے لئے درخواست بھی دی ہوئی ہے جس پر ابھی پنجاب حکومت نے میڈیکل رپورٹس کا جائزہ لے کر فیصلہ کرنا ہے۔