مودی کا فاشسٹ نظریہ علاقائی امن و استحکام کے لئے سب سے بڑا خطرہ ہے،عمران خان

اسلام آباد: وزیراعظم عمران خان کا کہنا ہے کہ عالمی برادری بھارت اور مقبوضہ کشمیر میں مودی کے جمہوریت دشمن اور فسطائی نظریے کے تسلط کا اعتراف کررہی ہے۔

سماجی رابطوں کی ویب سائٹ ٹوئٹر پر جاری اپنے بیان میں وزیراعظم عمران خان نے معروف جریدے دی اکانومسٹ کے سرورق کی تصویر شیئر کی ہے، جس میں ‘عدم برداشت والا بھارت’ کی سرخی سے مضمون شائع ہوا ہے۔

وزیراعظم عمران خان نے اپنے پیغام میں کہا ہے کہ دنیا اب تسلیم کررہی ہے کہ مودی حکومت بھارت اور مقبوضہ جموں و کشمیر میں جمہوریت مخالف اور فسطائی نظریے کو مسلط کر رہی ہے۔ عمران خان نے مزید کہا کہ مودی کا رویہ علاقائی امن و استحکام کے لئے سب سے بڑا خطرہ ہے۔

دنیا اب برملا تسلیم کررہی ہےکہ مقبوضہ جموں و کشمیر اور بھارت میں غیرجمہوری اور فاشسٹ نظریہ مسلط کیاجارہا ہے۔ یہ خطے کی سلامتی اور امن کیلئے سب سے بڑا خطرہ ہے۔80 لاکھ کشمیری اور بھارت میں بسنے والے مسلمان پہلے ہی مودی کی سفاک پالیسیوں کی بھینٹ چڑھ رہے ہیں۔
pic.twitter.com/9e2rJonZUB

— Imran Khan (@ImranKhanPTI) January 25, 2020

وزیراعظم عمران خان نے مزید کہا ہے کہ بھارت میں بسنے والے مسلمان اور مقبوضہ کشمیر کے 80 لاکھ کشمیری مودی کی فاشسٹ پالیسیوں کی وجہ سے مظالم کا شکار ہیں۔