پاکستانی معیشت پرمزید بوجھ۔۔ قرضوں میں11 ہزار 610 ارب روپے کا اضافہ

اسلام آباد: حکومت نے 15 ماہ کے دوران قرضوں میں 11 ہزار 610 ارب روپے اضافے کا اعتراف کر لیا ہے،44 ہزار ارب روپے کی پاکستانی معیشت پراس وقت مجموعی طور پر41 ہزار489 ارب روپے کا قرض ہے۔

وزارت خزانہ کی جانب سے جاری کردہ ڈیٹ پالیسی اسٹیٹ منٹ برائے 2019-20 جاری کر دی گئی ہے، جس میں حکومت نے 15  ماہ کے دوران قرضوں میں ساڑھے 11 ہزار ارب روپے سے زائد کے اضافے کا اعتراف کیا ہے

وزارت خزانہ کا کہنا ہے کہ یکم جولائی 2018 سے 30 ستمبر2019 کے دوران قرضے بڑھے، 15 ماہ میں حکومتی قرضوں میں 9 ہزار288 ارب روپے کا اضافہ ہوا،جن میں 6 ہزار 234 ارب روپے مقامی جب کہ 2 ہزار 802 ارب روپے کے غیر ملکی حکومتی قرضے شامل ہیں۔

حکومتی اعداد و شمار کے مطابق 30 جون 2018 کو پاکستان پر 29 ہزار 879 ارب روپے قرض تھا جن میں حکومتی قرضے 24 ہزار 953 ارب روپے تھے۔۔۔جو 30 ستمبر2019 تک 34 ہزار241 ارب روپے  ہو گئے جب کہ اس وقت پاکستان پر قرضوں کا مجموعی بوجھ 41 ہزار 489 ارب روپے تک پہنچ چکا ہے۔ جو کہ مجموعی معیشت کا 94 اعشاریہ 3 فیصد ہے۔