پاکستانی کوششوں سے امریکا طالبان امن معاہدے کی راہ ہموار ہوگی، زلمے خلیل زاد

اسلام آباد: امریکی سفارتخانے کے امریکا کے نمائندہ خصوصی برائے افغان مفاہمتی عمل زلمے خلیل زاد کے دورہ پاکستان کا اعلامیہ جاری کر دیا گیا ہے۔

امریکی سفارتخانے کی جانب سے جاری اعلامیے میں کہا گیا ہے کہ ایمبیسڈر زلمے خلیل زاد نے 31 جنوری کو اسلام آباد کا دورہ کیا، انہوں نے وزیرخارجہ شاہ محمود قریشی اور آرمی چیف جنرل قمر جاوید باجوہ سے سمیت پاکستانی قیادت سے ملاقاتیں کیں۔ ان ملاقاتوں میں افغان جنگ کے خاتمے اور وہاں پرسیاسی تصفیے کیلئے جاری امریکی کوششوں سے متعلق بات چیت کی گئی۔

 بیان میں کہا گیا ہے کہ زلمےخلیل زاد نے طالبان کو پرتشدد کارروائیوں میں کمی پر آمادہ کرنے کی پاکستانی کوششوں کی تعریف کی اور کہا کہ افغانستان میں پرتشدد کاروائیاں کم ہونے سے امریکا طالبان امن معاہدے کی راہ ہموار کرے گی،جب کہ پاکستانی کوششیں انٹرا افغان مذاکرات، خطے اور بالخصوص افغانستان میں مکمل اور پائیدار امن کیلئے بھی معاون ثابت ہوں گی۔