مودی نے پاکستان پر حملے کی کوشش کی تو یہ اُس کی آخری غلطی ہوگی، عمران خان

میرپور: وزیراعظم نے کہا ہے کہ پاکستان کی مسلح افواج اورعوام اپنے ملک کا دفاع کرنا جانتے ہیں،بھارت نے جس دن پاکستان کو فتح کرنے کی کوشش کی تو یہ اس کی آخری غلطی ہوگی، پاکستان کا بچہ بچہ آخری سانس تک لڑے گا۔مودی کی حماقت کے بعد کشمیر آزاد ہو کر رہے گا۔

مقبوضہ کشمیر میں بھارتی مظالم کا شکار کشمیریویں سے یکجہتی کیلئے میرپور میں منعقدہ جلسے سے خطاب کرتے ہوئے وزیراعظم عمران خان نے کہا مقبوضہ وادی میں 5 اگست کے بعد 80 لاکھ کشمیری مشکل ترین امتحان سے گزر رہے ہیں وزیراعظم نے کہا کہ 5 اگست سے پہلے دنیا کشمیر کو بھول چکی تھی، پاکستان کے سربراہ بھی کشمیر کا نام نہیں لیتے تھے، اسلامی ممالک بھی کشمیر کی بات نہیں کرتے تھے۔

اپنی بات جاری رکھتے ہوئے وزیراعظم عمران خان نے کہا کہ 5 اگست کے بعد مسئلہ کشمیر عالمی سطح پر اجاگر ہوا، امریکا اور برطانیہ میں کشمیر کا ایشو اٹھایا گیا، دنیا آج کشمیر کے لوگوں کے حالات جان گئی ہے، یورپی یونین کے 600 ممبران پارلیمنٹ نے کشمیر سے کرفیو ہٹانے کا مطالبہ کیا۔ 6 ماہ میں 3 مرتبہ اقوام متحدہ کی سلامتی کونسل میں کشمیر کا ذکر ہوا۔

عمران خان نے مزید کہا سلامتی کونسل میں 3 بار مسئلہ کشمیر زیر بحث آیا، امریکی کانگریس، یورپی یونین، برطانوی پارلیمنٹ میں مسئلہ کشمیر پر بات ہوئی، جانتا ہوں کشمیریوں پر ظلم ہو رہا ہے وہ مشکل وقت سے گزر رہے ہیں، یہاں وزیراعظم نہیں کشمیر کے سفیر کی حیثیت سے کھڑا ہوں، امریکی صدر سے 3 بار مسئلہ کشمیر پر بات کی، کینیڈین، برطانوی وزیراعظم، فرانسیسی صدر، جرمن چانسلر سے بھی بات کی، آج دنیا مسئلہ کشمیر اور آر ایس ایس کا نظریہ سمجھ چکی ہے۔

وزیراعظم نے کہا کہ مقبوضہ کشمیر میں کرفیو زیادہ دیر تک نہیں رہ سکے گا، کشمیر سے جس دن کرفیو اٹھا انسانوں کا سمندر نکلے گا، لگتا ہے مودی نے تاریخ نہیں پڑھی، دنیا کی طاقتور فوج 20 سال سے افغانستان میں ہے، دنیا کی دو سب سے طاقتور فوجیں روس کی سردی میں تباہ ہوئیں۔

ان کا کہنا تھا کہ بھارتی وزیراعظم نریندرا مودی نے ساری انتخابی مہم میں انتہا پسند بیانات دیئے، بھارت کا بڑی بڑی مونچھوں والا پائلٹ گرا، ہم نے واپس کر دیا، مودی نے کہا پاکستان نے ڈر کر پائلٹ واپس کر دیا، مودی نے بالا کوٹ میں ہمارے درخت شہید کر دیئے، مجھے سخت تکلیف ہوتی ہے جب ہمارے درختوں کو شہید کیا جائے۔

مودی اس غلط فہمی میں نہ رہے کہ پاکستان پر حملہ کرکے بھارتی عوام کی توجہ ہٹا دے گا، بھارت نے جس دن حملے کی غلطی کی تو پاکستان کا بچہ بچہ آخری سانس تک لڑے گا، ہم مقابلہ کریں گے اور کرکے دکھائیں گے، پاکستانی فوج نے دہشت گردی کے خلاف وہ جنگ جیتی ہے جو دنیا کی بڑی بڑی فوجیں نہیں جیت سکیں۔