کینیڈین خاتون روزی گیبرئیل کی ذاتی انکشافات پر مبنی ویڈیو وائرل، دیکھنے والی ہر آنکھ پُرنم

کینیڈا سے تعلق رکھنے والی بائیک رائیڈر خاتون روزی گیبرئیل کی نئی ویڈیو سوشل میڈیا پر وائرل ہوگئی ہے جس میں انہوں نے اپنی زندگی سے متعلق اہم انکشافات کئے ویڈیو دیکھنے والوں کی آنکھیں پرنم ہو گئیں۔

گزشتہ سال اپنی ہیوی بائیک پر پورے پاکستان کا سفر کرنے اور دینِ اسلام قبول کرنے والی مہم جو کینیڈین خاتون روزی گیبریئیل کی نئی ویڈیو کا عنوان ‘پاکستان نے کس طرح میری زندگی بدل دی’  ہے جس میں روزی اپنی پرانی ویڈیو میں کسی مرض کی شدت سے روتے ہوئے دکھائی دیتی ہیں اور ایک معجزے کا انتظار کرتی ہیں۔

اس کے بعد ویڈیو میں وہ پاکستان جانے کی تیاری کرتی نظر آتی ہیں۔ ویڈیو کے درمیان میں وہ پاکستانیوں کی محبت، مہمان نوازی اور گوادر سے گلگت تک کے خوبصورت مقامات دکھاتی ہیں۔بعد ازاں ویڈیو میں انہوں نے کہا کہ میرے پاس الفاظ نہیں لیکن پاکستانی عوام نے مجھے بے انتہا محبت دی اور قبولیت بخشی۔

ایک جگہ وہ روتے ہوئے کہتی ہیں کہ پاکستان کے لوگدنیا میں سب سے خوبصورت اور حیرت انگیز ہیں، یہ مسلمان ہیں، آپ میں سے کتنوں نے انہیں دیکھا اور جانا ہے، یہ آپ کو دیکھ کر اپنے گھر بلاتے ہیں اور اپنے گھر کی ہر شے آپ کو دے دیتے ہیں۔

روزی نے مزید کہا کہ  ‘اے دنیا والو! جاگ جاؤ، آپ ان پاکستانیوں سے بہت کچھ سیکھ سکتے ہیں، اور میں خدا سے امید رکھتی ہوں کہ میرا جو تجربہ آپ دیکھ رہے ہیں وہ آپ کا ذہن بدل دے’۔ انہوں نے مزید کہا ہے کہ  اگرآپ ہر شخص سے یکساں سلوک کریں تو دنیا سے امتیازات ختم ہوجائیں گے، دنیا کو چاہیے کہ وہ حقیقی حسن دیکھے اور انسانیت سے اصل رشتے کو میرے تجربے سے پہچانے، یہی زندگی ہے۔

اس کے بعد ویڈیو میں روزی کے ہاتھوں میں قرآن مجید کا انگریزی ترجمہ دیکھا جاسکتا ہے اور وہ کہتی ہیں کہ یہ محض پاکستان کا ایک سفر نہیں تھا بلکہ ان کی روح کی تسخیر تھی۔ ‘‘میری تکلیف دہ زندگی ختم ہوئی اور مجھے سکون مل گیا، میں نے اپنے سفر میں سچ کو پہچانا ہے، پاکستانیوں کی رحم دلی نے میرے دماغ کو سکون پہنچایا۔ بعد ازاں انہوں نے اپنے اسلام قبول کرنے کا منظر بھی شیئر کیا ہے۔

ویڈیو کی سب سے اہم بات روزی کا لکھا وہ نوٹ ہے جس میں وہ شروع میں اپنے رونے کی وجہ بتاتی ہیں۔ روزی نے کہا کہ میں زندگی کے نشیبی حصے میں تھی۔ ڈپریشن، ذہنی تناؤ اور خودکشی کے خیالات میں گھری ہوئی تھی۔

روزی نے بتایا کہ ’مجھے 20 برس سے لائم بیماری تھی اور پیدائشی طور پر مجھے شریانوں کا مرض لاحق رہا، میرے 9 آپریشن ہوئے، پھرمیرا ایک ناکارہ گردہ بھی نکالا گیا جس کے بعد میں مایوس ہوگئی لیکن میرے ایک دوست کی موت نے مجھے جگادیا، میں نے کہا کہ مجھے بستر پر نہیں مرنا اور زندگی مختصر ہے۔

کینیڈین خاتون روزی کے مطابق اس کے بعد میں نے موٹر سائیکل پر دنیا کے سفر کا ارادہ کیا ورنہ گھر پر دھیرے دھیرے موت کے منہ میں جانا پڑتا لیکن اس سفر میں گرتی ہوئی صحت کے خیال سے پریشان رہی تاہم سب کچھ ٹھیک ہوگیا اور میں سمجھتی ہوں کہ اس طرح میں لوگوں کو ترغیب دے سکتی ہوں