آٹا،چینی مہنگی کرنے والوں کیخلاف تحقیقات جاری، ذمہ داروں کو سزا ملے گی، وزیراعظم

اسلام آباد: وزیراعظم عمران خان نے کہا کہ کچھ بھی ہوجائے پاکستان تحریک انصاف کی حکومت، وفاقی کابینہ کے اگلے اجلاس میں بنیادی غذائی اجناس کی قیمتوں میں کمی کے لیے مختلف اقدامات کا اعلان کرے گی۔

سماجی رابطے کی ویب سائٹ ٹوئٹر پر جاری اپنے ایک بیان میں وزیراعظم عمران خان نے کہا کہ ان مشکلات کا ادراک ہے جن کا تنخواہ دارطبقے سمیت مجموعی طور پر عوام کو سامنا ہے چنانچہ میں نے فیصلہ کیا ہے کہ کچھ بھی ہوجائے، حکومت منگل (11 فروری) کو ہونے والے کابینہ اجلاس میں عوام کے لیے بنیادی غذائی اجناس کی قیمتوں میں کمی کی خاطر مختلف اقدامات کا اعلان کرے گی۔

I understand the difficulties ordinary people incl salaried class are confronting & have decided, come what may, my govt will be announcing various measures that will be taken to reduce prices of basic food items for the common man in Cabinet on Tuesday.

— Imran Khan (@ImranKhanPTI) February 9, 2020

عمران خان نے مزید کہا کہ تمام متعلقہ حکومتی ادارے آٹے اور چینی کی قیمتوں میں اضافے کے اسباب کی جامع تحقیقات کا آغاز کرچکے ہیں۔ وزیراعظم نے کہا کہ قوم اطمینان رکھے ذمہ داروں کا بھرپور محاسبہ کیا جائے گا اور انہیں قرار واقعی سزا دی جائے گی۔

خیال رہے کہ گزشتہ روز وزیراعظم کی زیرصدارت ہونے والے اجلاس میں کھانے پینے کی اشیاء کی سستے نرخوں فراہمی پر غور اور عوامی ریلیف کے حوالے سے آٹا، گھی، چینی، چاول اور دالوں کی قیمتیں کم کرنے کا فیصلہ کیا گیا تھا۔

اجلاس کے دوران وزیراعظم کا کہنا تھا کہ اگرغریب کا احساس نہیں کر سکتے توحکومت میں رہنے کاحق نہیں، عام آدمی کے کچن میں بنیادی اشیاء ہر حال میں پہنچائیں، جن لوگ قوت خرید نہیں رکھتے انہیں حکومت احساس پروگرام کے تحت راشن دے گی۔