عالمی برادری بھارت میں جاری فسادات،مسلمانوں پرمظالم کا نوٹس لے، شاہ محمود قریشی

اسلام آباد: وزیرخارجہ شاہ محمود قریشی کا کہنا ہے کہ بھارت میں مسلمانوں پر مظالم جاری ہیں، دو روز کے دوران ایک درجن سے زائد ہلاکتیں، نجی املاک کو نذرآتش کر دیا گیا ہے، دنیا کو اس صورت حال کا فوری نوٹس لینا چاہئے۔

اسلام آباد سے جاری اپنے ایک بیان میں وزیرخارجہ شاہ محمود قریشی نے کہا ہے کہ پاکستان ایک عرصے سے کہتا چلا آرہا ہے کہ بھارت میں مسلمان عدم تحفظ کا شکار ہیں گزشتہ دو روز سے دہلی میں دس سے زیادہ اموات ہو چکی ہیں عمارتوں کو نذر آتش کیا جا رہا ہے، پیٹرول پمپس اور کاروباری مراکز کو جلایا جا رہا ہے، دنیا کو اس صورت حال کا فوری نوٹس لینا چاہئے۔

وزیرخارجہ مخدوم شاہ محمود قریشی نے کہا ہے کہ بھارتی میڈیا نے امریکی صدر کی پریس کانفرنس کو اپنے مقاصد میں استعمال کرنے کی کوشش کی لیکن صدرٹرمپ نے دہشت گردی کے خلاف پاکستان کی کاوشوں کو سراہا ہے۔

انہوں نے کہا کہ صدر ٹرمپ نے ہزاروں لوگوں کی موجودگی میں واشگاف الفاظ میں کہا ہے کہ عمران خان ان کے دوست ہیں اور پاکستان نے بہترین حکمت عملی سے دہشت گردی کو شکست دی ہے۔ صدر ٹرمپ نے وزیراعظم عمران خان کے ساتھ کیے گئے وعدے کے مطابق کشمیرکے حوالے سے بھارتی وزیراعظم مودی سے بات کی۔

وزیرخارجہ شاہ محمود قریشی نے کہا  ہے کہ مقبوضہ جموں و کشمیر کی تشویش ناک صورتحال اور دنیا بھر کے رد عمل کو پیش نظر رکھتے ہوئے امریکی صدر ڈونلڈ ٹرمپ کی طرف سے تنازعہ کشمیر پر ایک بار پھر ثالثی کی پیش کش کی گئی جو کہ بھارتی بیانیے کی نفی ہے۔