ڈالر کی اونچی اڑان۔۔۔روپیہ ہلکان، انٹربینک میں ڈالر168 روپے کی بلند ترین سطح

کراچی: غیرملکی کرنسی کی ذخیرہ اندوزی کے باعث ڈالر کی قدر میں مسلسل اضافہ ہو رہا ہے، انٹر بینک میں ڈالر ملکی تاریخ کی بلند ترین سطح 168 روپے پر جا پہنچا ہے۔

کورونا وائرس سے پیدا ہونے والی صورتحال نے جہاں پاکستان کی اسٹاک مارکیٹ کو شدید نقصان پہنچایا ہے وہیں امریکی ڈالر کی ذخیرہ اندوزی بھی شروع ہو گئی ہے۔ جس کے باعث امریکی ڈالر کے مقابلے میں پاکستانی کرنسی تاریخ کی کم ترین سطح پر پہنچ گئی۔

جمعے کے روز انٹر بینک میں روپے کے مقابلے میں امریکی ڈالر مزید ایک روپے 87 پیسے مہنگا ہو گیا، جس کے بعد ڈالر کی قیمت ملکی تاریخ کی بلند ترین سطح 168 روپے تک پہنچ گیا ہے،گزشتہ 4 روز کے دوران امریکی ڈالر کی قدر میں 8 روپے 20 پیسے اضافہ ہوا ہے۔ جس سے غیرملکی قرضہ 800 ارب روپے بڑھ گئے ہیں۔