پی آئی اے کی 101 خصوصی پروازوں کے ذریعے 11 ہزار پاکستانی وطن پہنچ گئے

اسلام آباد: کورونا وائرس کے باعث دنیا بھر میں پھنسے پاکستانیوں کی واپسی کا سلسلہ جاری ہے، مختلف ممالک سے 11 ہزار سے زائد پاکستانیوں کو وطن پہنچا دیا گیا۔

قومی ایئر لائن کے ترجمان کا کہنا ہے کہ 101 خصوصی پروازوں کے ذریعے بیرون ملک پھنسے 11 ہزار سے زائد ہم وطنوں کو واپس لایا جاچکا ہے جن میں سعودی عرب میں پھنسے پاکستانی اور عمرہ زائرین بھی شامل ہیں۔ پی آئی اے اب تک جاپان، متحدہ عرب امارات اور سعودی عرب سمیت کینیڈا، برطانیہ، فرانس، ترکی اور عراق سے پاکستانیوں کو وطن واپس لاچکی ہے۔

ترجمان کا کہنا تھا کہ قومی ائیر لائن نے بیرون ملک میں پھنسے پاکستانیوں کو وطن واپس لانے کے لیے پلان مرتب کیا تھا جس کا پہلا مرحلہ 14 اپریل سے 19 اپریل تک تھا اور اب دوسرا مرحلہ جاری ہے۔

دوسری جانب تاریخ میں پہلی بار پی آئی اے کی خصوصی پرواز آسٹریلیا روانہ ہو گئی ہے، جس کے ذریعے 300 سے زائد مسافر میلبورن روانہ ہوئے۔ قومی ایئر لائن کی یہ پرواز آسٹریلیا میں پھنسے پاکستانیوں کو لے کر 26 اپریل کو لاہور پہنچے گی۔