آرمی چیف کا کورونا سے متاثرہ پی آئی اے عملے کے فوجی اسپتالوں میں علاج کا اعلان

اسلام آباد: پاک فوج کے سربراہ جنرل قمر جاوید باجوہ نے کورونا سے متاثرہ پی آئی اے عملے کیلئے ملک بھر کے کمبائنڈ ملٹری ہاسپٹلز میں علاج کا اعلان کیا ہے، دوسری جانب ائیر چیف مارشل مجاہد انور خان نے اندرون ملک پھنسے پی آئی اے عملے کو پروازوں پر واپس پہنچانے کیلئے سی 130 طیاروں میں جگہ دینے کی ہدایت کر دی ہے۔

بیرون ممالک سے پاکستانیوں کو وطن واپس لانے کیلئے پی آئی اے کی خصوصی پروازوں کا سلسلہ جاری ہے عالمی وباء کے دوران فرائض انجام دینے والے قومی ایئرلائن متعدد ملازمین کورونا وائرس سے متاثر ہو چکے ہیں، آرمی چیف جنرل قمر جاوید باجوہ نے کوروناسے متاثرہ پی آئی اے عملے کے لئے فوجی اسپتالوں میں علاج کی سہولت کا اعلان کیا ہے۔

سربراہ پاک فضائیہ مجاہد انورخان نے اندرون ملک پروازیں نہ ہونے کے باعث مختلف شہروں میں پھنس جانے والے پی آئی اے کے فضائی عملے کو واپس پہنچانے کے لئے سی ون تھرٹی کارگو طیاروں میں نشستیں فراہم کرنے کا اعلان کیا ہے۔ پی آئی اے کے سربراہ ائیر مارشل ارشد ملک نے بری اور فضائی سربراہان سے اظہار تشکر کیا ہے۔

قومی ایئر لائن کے سربراہ ایئرمارشل ارشد ملک کا کہنا ہے کہ مشکل گھڑی میں تمام اداروں کا باہم تعاون قومی طاقت کا سبب بنتا ہے، دیار غیر میں پھنسے ہم وطنوں کی واپسی کیلئےخطرات کے باوجود پروازیں چلا رہے ہیں، اب تک 24 ہزار سے زائد افراد پی آئی اے کے ذریعے واپس اپنے گھروں کو پہنچ چکے ہیں۔

انہوں نے کہا کہ ہزاروں پاکستانیوں کی فریادیں موصول ہوئی ہیں جو اب بھی بیرون ممالک میں قومی ایئر لائن کے منتظر ہیں۔ پی آئی اے آخری پاکستانی کی وطن واپسی تک حکومت کی اجازت سے آپریشن جاری رکھے گا۔پی آئی اے ان اپنوں کے جسد خاکی کو بھی وطن واپس پنچائے گا جو کہ دیار غیر میں جاں بحق ہو چکے ہیں۔

ایئر مارشل ارشد ملک کا مزید کہنا ہے کہ وزیر ہوا بازی غلام سرور خان کی خصوصی کاوشیں اور قائدانہ صلاحیتیں اس قومی خدمت میں ہمارے ساتھ شامل حال ہیں، ہمیں اس مشن میں تمام حکومتی حلقوں اور قومی اداروں کی مکمل مدد حاصل  ہے جس کیلئے ہم سب کے خلوص دل سے شکر گزار ہیں۔