بہترحکمت عملی کے باعث ملک میں کورونا کے خوف کی فضاء ختم ہو رہی ہے، وزیراعظم

اسلام آباد: وزیراعظم عمران خان کا کہنا ہے کہ سب سے بڑا چیلنج عام آدمی تک فوری ریلیف پہنچانا تھا، خوشی ہے کہ معاشی ٹیم نے بروقت ہنگامی ایکشن پلان ترتیب دیا، بہترحکمت عملی کے باعث ملک میں وباء کے خوف کی فضا ختم ہو رہی ہے۔

وزیراعظم آفس کی جانب سے جاری اعلامیے میں کہا گیا ہے کہ وزیراعظم عمران خان سے مشیر پارلیمانی امور بابر اعوان نے ملاقات کی۔ جس میں کورونا کی صورتحال، وباء کے بعد ریلیف سے متعلق حکومتی اقدامات کے ساتھ ساتھ پارلیمان کا اجلاس بلانے کے حوالے سے امور پر تبادلہ خیال کیا گیا، ملاقات میں گڈ گورننس اور انتظامی معاملات میں بہتری کیلئے مخلتف تجاویز پر مشاورت کی گئی۔

 اس موقع پر وزیراعظم عمران خان کا کہنا تھا کہ کورونا وائرس پر قابو پانے کے لیے تمام وسائل بروئے کار لائے جا رہے ہیں،سب سے بڑا چیلنج عام آدمی تک فوری ریلیف پہنچانا تھا، خوشی ہے کہ معاشی ٹیم نے بروقت ہنگامی ایکشن پلان ترتیب دیا۔

اپنی بات جاری رکھتے ہوئے وزیراعظم نے کہا کہ بہتر حکمت عملی کی وجہ سے ملک میں وباء کے حوالے سے خوف کی فضا ختم ہو رہی ہے تاہم عوام کو احتیاطی تدابیر ترک نہیں کرنی چاہئیں، تحریک انصاف کی حکومت ملک میں معاشی عمل تیز کرنے کیلئے بڑے اقدامات کرنے جا رہی ہے۔

مشیرپارلیمانی اموربابر اعوان کا کہنا تھا کہ حکومت نے تدبر کا مظاہرہ کیا ملکی تاریخ میں پہلی بار غریب دوست ریلیف پیکجز دئیے گئے ہیں اپوزیشن جماعتوں کے پاس عوامی منشور نہیں صرف الزام کی سیاست کی جا رہی ہے۔

بابراعوان نے بتایا کہ پارلیمنٹ کا اجلاس بلانے کے معاملہ پر نیشنل ڈیزاسٹر مینجمنٹ اتھارٹی (این ڈی ایم اے) اور نیشنل کمانڈ اینڈ آپریشن سنٹر (این سی او سی) سے رابطے میں ہیں، حفاظتی انتظامات تسلی بخش ہوئے تو پارلیمنٹ میں قانون سازی کا عمل بلا تاخیر شروع کردیا جائے گا۔