وزیراعظم کی حکومتی ترجمانوں کو فارن فنڈنگ کیس کی تفصیلات عوام کے سامنے کی ہدایت

اسلام آباد: وزیراعظم عمران خان کا کہنا ہے کہ اپوزیشن ممنوعہ فنڈنگ کیس سے متعلق عوام کو گمراہ کررہی ہے۔ حکومتی و پارٹی ترجمان تحریک انصاف فارن فنڈنگ کیس کے حقائق عوام کے سامنے لائیں۔

وزیراعظم عمران خان کی زیر صدارت حکومتی اور پارٹی ترجمانوں کا اہم اجلاس ہوا جس میں اٹارنی جنرل انور منصور خان نے پی ٹی آئی کے خلاف ممنوعہ فنڈنگ کیس جب کہ معاشی ٹیم نے معیشت میں حاصل کامیابیوں پر بریفنگ دی۔

وزیراعظم عمران خان نے تحریک انصاف کے خلافف غیر ملکی فنڈنگ کیس سے متعلق حقائق عوام کے سامنے لانے کی ہدایت دیتے ہوئے کہا کہ قوم کو کیس کے قانونی پہلوؤں کی تفصیلات سے آگاہ کیا جائے، کیونکہ اپوزیشن ممنوعہ فنڈنگ کیس سے متعلق عوام کو گمراہ کررہی ہے، الیکشن کمیشن میں سب تفصیلات جمع کروائی ہیں،تحریک انصاف کا دامن صاف ہے۔

اپوزیشن جماعتوں کی جانب سے کل جماعتی کانفرنس بلائے جانے سے متعلق وزیراعظم نے کہا کہ عوام نے اپوزیشن کے احتجاج کو مسترد کردیا، اب اپوزیشن اپنی خفت مٹانے کے لیے اے پی سی اور احتجاج  کر رہی ہے، اپوزیشن عوامی حمایت کھوچکی اب 4 سال انتظار کرے، دونوں بڑی جماعتوں کے رہنماؤں نے منی لانڈرنگ سے پیسہ بنایا۔

ذرائع کا کہنا ہے کہ پی ٹی آئی رہنما کل ممنوعہ فنڈنگ کیس پر پریس کانفرنس کریں گے، وفاقی وزیراسد عمر اور فرخ حبیب کل پریس کانفرنس کریں گے جس میں فارن فنڈنگ کیس کے قانونی پہلوؤں سے عوام کو آگاہ کیا جائے گا۔