کلبھوش کیس میں عالمی عدالت کے فیصلے پرعملدرآمد نہ کرنے کا بھارتی وکیل کا الزام مسترد

اسلام آباد: پاکستان نے دہشت گرد کلبھوشن یادیو کے معاملے پر بھارتی وکیل ہریش سالوے کا الزام مسترد کرتے ہوئے کہا ہے کہ پاکستان عالمی عدالت انصاف کے فیصلے پر پوری طرح عمل کررہا ہے۔

ترجمان دفتر خارجہ عائشہ فاروقی کی جانب سے جاری بیان میں جاسوس کلبھوشن یادیو کے معاملے پر بھارتی وکیل ہریش سالوے کا دعویٰ مسترد کیا گیا ہے، انہوں نے کہا ہے کہ بھارتی وکیل ہریش سالوے کے 03 مئی کو آن لائن لیکچر میں دیئے گئے بیانات کا معلوم ہوا ہے۔

عائشہ فاروقی کا کہنا ہے کہ ہریش سالوے نے عالمی عدالت انصاف میں واپس جانے کی تجویز دیتے ہوئے حقائق کے منافی بیانات دیئے، یہ دعویٰ غلط ہے کہ پاکستان نے عالمی عدالت انصاف کے فیصلے کی تعمیل نہیں کی ہے۔ حقائق کو غلط انداز میں پیش کرنا افسوسناک ہے۔

ترجمان دفتر خارجہ نے کہا کہ پاکستان عالمی عدالت انصاف کے فیصلے پرپوری طرح عمل کررہا ہے،پاکستان نے بھارت کو اس کے گرفتار دہشت گرد تک قونصلر رسائی فراہم کی، عالمی عدالت کے فیصلے کے مطابق بھارتی جاسوس کی سزا کے خلاف نظرثانی کا موقع فراہم کرنے کے اقدامات کیے جارہے ہیں۔

عائشہ فاروقی نے اپنے بیان میں واضح کیا ہے کہ ایک ذمہ دارریاست کی حیثیت سے پاکستان بین الاقوامی ذمہ داریوں سے آگاہ ہے، کیس کے آگے بڑھنے پر پاکستان عالمی عدالت کے فیصلے پرعمل درآمد کے لیے پرعزم ہے۔

واضح رہے کہ ہریش سالوے نے ہی عالمی عدالت انصاف میں بھارت کی جانب سے راء کے حاضرسروس افسر کلبھوشن کے کیس کی پیروی کی تھی۔ 3 مئی کو آن لائن لیکچر میں سالوے نے دعوی کیا تھا کہ بھارت کئی مرتبہ پاکستان سے عالمی عدالت انصاف کے فیصلے کی روشنی میں اٹھائے گئے اقدامات سے متعلق پوچھ چکا ہے لیکن پاکستان اس حوالے سے کوئی جواب نہیں دے رہا۔

بھارتی دہشت گرد کلبھوشن یادیو کے وکیل ہریش سالوے کا یہ بھی کہنا تھا کہ بھارت نے بیک ڈور سفارت کاری کے ذریعے پاکستان کو اس بات پر قائل کرنے کی کوشش کی کہ کلبھوشن کو چھوڑ دیا جائے۔ چاہے انسانی بنیادوں پر یا کسی اور بنیاد پر ہم کلبھوشن کی رہائی چاہتے ہیں۔