وفاقی کابینہ کا ملک میں نافذ لاک ڈاؤن اور پابندیوں میں مزید نرمی کے فیصلے پر اتفاق

اسلام آباد: وفاقی کابینہ نے کورونا وائرس کے باعث ملک میں نافذ لاک ڈاؤن اور پابندیوں میں مزید نرمی کے فیصلے پر اتفاق کیا ہے۔

وزیراعظم عمران خان کے زیرصدارت وفاقی کابینہ کا اجلاس اسلام آباد میں ہوا،  جس میں ملک کی مجموعی صورتحال، کورونا وباء کے ملکی معیشت پر اثرات اور اس حوالے سے حکومتی اقدامات کے نتائج کا جائزہ لیا گیا۔

ذرائع کے مطابق اجلاس کے دوران وزیراعظم عمران خان نے کورونا وائرس کی صورتحال پر گفتگو کرتے ہوئے کہا کہ وہ پہلے دن سے ہی لاک ڈاؤن کے حق میں نہیں تھے، اب وقت کے ساتھ ساتھ اس میں مزید نرمی لائیں گے۔

ٹرانسپورٹ بندش کے باعث عوامی مشکلات کے ازالے کے لئے وزیراعظم عمران خان نے عندیہ دیا کہ صوبوں سے اتفاق رائے کے بعد جلد ٹرانسپورٹ اور ٹرینوں کی آمدورفت کھولیں گے۔ ان کا کہنا تھا کہ حکومت نے لوگوں کو ایس او پیز کی پابندی اور احتیاطی تدابیر کی ترغیب دینا ہے۔

ذرائع کے مطابق اجلاس کے دوران معاون خصوصی برائے اطلاعات عاصم سلیم باجوہ نے اشتہاری مہم کے لئے فنڈز مانگتے ہوئے کہا کہ احساس پروگرام کے تحت اربوں روپے کی رقوم تقسیم ہوئیں، مگر تشہیر نہیں ہوئی۔

وزیراعظم کے معاون خصوصی برائے اطلاعات عاصم سلیم باجوہ کا کہنا تھا کہ فنڈز فراہم کئے جائیں تاکہ اچھے کام کو مشتہر کیا جا سکے۔ وزیراعظم نے متعلقہ وزارتوں کو اشتہارات کے لئے فنڈز فراہم کرنے کی ہدایت کر دی۔