اداکارہ نکولا کوفلن نے فلسطینی بچوں کے ریلیف فنڈ کے لیے 20 لاکھ امریکی ڈالر جمع کر لئے

نیٹ فلکس کی ہٹ سیریز           برجرٹن میں پینلپے فیدرنگٹن کا کردار ادا کرنے والی آئرش اداکار نکولا کوفلن نے اپنی سوشل میڈیا مہم کے ذریعے فلسطینی بچوں کے ریلیف فنڈ (پی سی آر ایف)کے لیے 20 لاکھ امریکی ڈالر جمع کر لئے جس پر پی سی آر ایف نے نکولا کوفلن کا شکریہ ادا کیا ہے۔

پی سی آر ایف کی طرف سے ایکس پر جاری بیان میں کہا گیا ہے کہ ادارہ جنگ سے تباہ حال غزہ میں ریلیف اور بحالی کی کوششوں، امن کی حمایت کی ترغیب دینے اور بے گھر ہونے والے ہزاروں بچوں اور سخت ضرورت مند خاندانوں کی مددکے جرات مندانہ اقدام پر نکولا کوفلن کا شکریہ ادا کرتا ہے۔

بیان میں مزید کہا گیا ہے کہ نکولا کوفلن کی کوششوں سے نہ صرف فلسطینی بچوں کے لئے خاطر خواہ فنڈز اکٹھے ہوئے ہیں بلکہ فلسطین کی صورتحال بارے آگاہی میں بھی اضافہ ہوا ہے۔37 سالہ نکولا کوفلن نے برجرٹن کے علاوہ متعدد فلموں، ٹی وی سیریز اور تھیٹر میں ادا کاری کے جوہر دکھائے ہیں۔

نکولا کوفلن کی مہم سے ثابت ہوتا ہے کہ عالمگیر شہرت رکھنے والی شخصیات فلسطینی بچوں اور خاندانوں کی حمایت میں نتیجہ خیز کردار ادا کر سکتی ہیں۔

مزید خبروں کیلئے وزٹ کریں