مادر وطن کو درپیش ہر قسم کے خطرات کا بھرپور جواب دیا جائے گا، آرمی چیف

راولپنڈی: پاک فوج کے سپہ سالار جنرل قمر جاوید باجوہ نے ملکی تحفظ اور سالمیت کیلئے عزم کا ایک بار پھر اظہار کرتے ہوئے کہا ہے کہ مادر وطن کو درپیش ہر قسم کے خطرات کا بھرپور جواب دیا جائے گا۔

مسلح افواج کے شعبہ تعلقات عامہ (انٹرسروسز پبلک ریلیشنز) کے مطابق آرمی چیف جنرل قمر جاوید باجوہ نے ملک کے حساس ادارے انٹرسروسز انٹیلی جنس (آئی ایس آئی) ہیڈ کوارٹرز کا دورہ کیا۔ آئی ایس آئی ہیڈ کوارٹرز پہنچنے پر ڈی جی لیفٹیننٹ جنرل فیض حمید نے آرمی چیف کا استقبال کیا۔

پاک فوج کے سربراہ کو آئی ایس ایس کی جانب سے ملک کی اندرونی اور بیرونی سیکیورٹی کی صورتحال پر بریفنگ دی گئی۔آرمی چیف جنرل قمر جاوید باجوہ نے آئی ایس آئی کی کارکردگی کو مزید بہتر بنانے کے حوالے سے اقدامات کو سراہا۔

آئی ایس پی کی جانب سے جاری بیان کے مطابق جنرل قمر جاوید باجوہ مادروطن کے دفاع، سالمیت و خود مختاری پر کسی قسم کا سمجھوتہ نہ کرنے کے عزم کو دہراتے ہوئے کہا کہ ہرطرح کے خطرات کا بھرپور جواب دیا جائے گا۔

اس قبل آرمی چیف جنرل قمر جاوید باجوہ سے پاکستان میں تعینات سعودی سفیر نواف المالکی نے بھی ملاقات کی جس میں علاقائی سلامتی، باہمی دلچسپی کے امور اور پاک سعودی دفاعی تعلقات پر بات چیت کی گئی۔