اسلام آباد ہائی کورٹ نے آصف علی زرداری کی عبوری ضمانت میں 28 جنوری تک توسیع کردی

جعلی بینک اکاؤنٹس کیسز،اسلام آباد ہائی کورٹ نے 8ارب روپے کی مشکوک ٹرانزیکشن کیس میں سابق صدر آصف علی زرداری کی عبوری ضمانت میں 28 جنوری تک توسیع کردی ۔ عدالت نے آصف زرداری کے طبی معائنہ کے لیے میڈیکل بورڈ تشکیل دینے کا بھی حکم دے دیا۔

جسٹس عامر فاروق اور جسٹس محسن اختر کیانی پر مشتمل دو رکنی ڈویژن بنچ نے آصف زرداری کی درخواست ضمانت کی سماعت کی۔ اس موقع پر سابق صدر کی طبی بنیادوں پر حاضری سے استثنا ءکی درخواست جمع کرائی گئی ، عدالت نے آصف زرداری کے طبی معائنہ کے لیے میڈیکل بورڈ تشکیل دینے کا حکم دیاجس پر نیب اور آصف زرداری کے وکیل فاروق ایچ نائیک نے رضامند ظاہر کی۔ عدالت نے حکم دیاکہ آصف زرداری کی میڈیکل رپورٹ بھی 28 جنوری تک پیش کی جائے ۔

جسٹس محسن اختر کیانی نے ریمارکس دئیے کہ وہ باتیں نہیں ہونی چاہئیں جو پہلے والے میڈیکل بورڈز کی رپورٹس پر ہوتی رہیں۔ واضح  رہے کہ چیئرمین نیب نے اس کیس میں آصف زرداری کے وارنٹ گرفتاری جاری کر رکھے ہیں۔