آزاد جموں و کشمیر کی نئی 20 رکنی کابینہ نے حلف اٹھا لیا

آزاد جموں و کشمیر کی نئی 20 رکنی کابینہ نے ایوانِ صدر مظفرآباد میں حلف اٹھا لیا، جس کے ساتھ ہی نئی حکومت کی ٹیم مکمل ہوگئی۔ کابینہ کی تشکیل میں دو روزہ مشاورتی عمل، سیاسی اتفاقِ رائے اور جماعتی مذاکرات بنیادی کردار رہے۔

 حلف برداری 

آزاد جموں و کشمیر کی نئی کابینہ کی حلف برداری کی تقریب ایوانِ صدر مظفرآباد میں منعقد ہوئی جس میں وزیر اعظم آزاد کشمیر فیصل ممتاز راٹھور خصوصی طور پر شریک ہوئے۔سپیکر قانون ساز اسمبلی چودھری لطیف اکبر نے 20 رکنی کابینہ سے حلف لیا، جن میں 18 وزراء اور 2 مشیر شامل ہیں۔

کابینہ کے ارکان نے عہدے سنبھال لیے

تقریب میں جن 18 وزراء نے حلف اٹھایا ان میں شامل ہیں:سردار فہیم ربانی، چودھری اخلاق، یاسر سلطان، سردار محمد حسین، نبیلہ ایوب، چودھری رشید، چودھری ارشد، جاوید بڈھانوی، جاوید ایوب، قاسم مجید، رفیق نیئر، دیوان چغتائی، ملک ظفر، ضیاء القمر، عامر یاسین، بازل نقوی، میاں عبدالوحید اور علی شان سونی۔

اس کے علاوہ 2 مشیروں نے بھی اپنے عہدے کا حلف اٹھایا، جن سے وزیر اعظم فیصل ممتاز راٹھور نے خصوصی طور پر حلف لیا۔

کابینہ کی تشکیل 

ذرائع کے مطابق نئی کابینہ کی تشکیل سے حکومت کو مضبوط استحکام حاصل ہوگا جبکہ آنے والے مہینوں میں انتظامی اور سیاسی فیصلوں کے لیے ٹیم مکمل ہو چکی ہے۔
نئی کابینہ سے توقع ہے کہ وہ آزاد کشمیر کے مالی، سیاسی اور ترقیاتی چیلنجز سے نمٹنے میں اہم کردار ادا کرے گی۔

مشاورتی عمل

واضح رہے کہ مشاورتی عمل مکمل نہ ہونے کے باعث کابینہ کی حلف برداری کی تقریب ایک دن قبل مؤخر کر دی گئی تھی۔ ابتدا میں صرف 10 وزراء تک محدود کابینہ کی تجویز پیش کی گئی تھی، تاہم اسمبلی ارکان کی مخالفت کے باعث تجویز مسترد کر دی گئی۔بعد ازاں گزشتہ دو روز سے جاری بھرپور مشاورت کی قیادت پیپلز پارٹی کی رہنما فریال تالپور اور نومنتخب وزیر اعظم فیصل ممتاز راٹھور نے کی۔ مختلف گروپوں کے تحفظات دور ہونے اور محکموں کی تقسیم پر اتفاق کے بعد آج حلف برداری کا فیصلہ کیا گیا۔

 کابینہ میں وسیع نمائندگی

سیاسی مبصرین کے مطابق 20 رکنی کابینہ حکومت کی جانب سے تمام گروپوں کو ساتھ لے کر چلنے کی حکمت عملی کی عکاس ہے۔ اس وسیع نمائندگی سے حکومتی استحکام، قانون سازی کے عمل اور بجٹ تیار کرنے میں آسانی کی توقع ہے۔