بلاول بھٹو کی جاتی امراء میں مریم نواز سے ملاقات ،عمران خان سے کوئی بات نہ کرنے کا اعلان

 چیئرمین پیپلز پارٹی بلاول بھٹو زرداری اور مسلم لیگ نون کی نائب صدر مریم نواز نے کہا ہے کہ عمران خان پہلے دھمکیاں دیتے تھے ،اب بات چیت کیلئے تیارہیں لیکن ان سے کوئی بات نہیں ہوگی۔

بلاول بھٹو زرداری نے مریم نواز سے جاتی امرا میں ملاقات کے بعد میڈیا سے گفتگو کرتے ہوئے کہاکہ پی ڈی ایم کے قیام سے اس میں دراڑ پیدا ہونے اور توڑنے کے خواب دیکھے جارہے ہیں، 13 دسمبر سے پہلے پی ڈی ایم قیادت کے پاس استعفے جمع ہوں گے، حکومت کی پریشانی سب کے سامنے ہے۔

بلاول بھٹو زرداری نے کہا کہ عمران خان کا بیانیہ ہر روز بدل جاتا ہے، پہلے دھمکیاں دیتا تھا اب بات چیت کیلئے تیار ہے اور این آر او مانگ رہاہے، لیکن کٹھ پتلی حکومت سے بات چیت کا وقت گزرگیا، کٹھ پتلی خود بخود گھر چلی جائے تو اچھا ہے۔حکومت اور اس کی سہولت کار اسٹبلشمنٹ کو گھر بھیجنا ہے، سلیکٹرز کا نام کھل کے اس لئے نہیں لیا کہ ہم بھی ان کا مان رکھتے ہیں۔

اس موقع پر مریم نواز نے کہا کہ سلیکٹڈ کو کہتے ہیں راستے سے ہٹ جاؤ، حکومتی وزرا ء ذہنی پستی کا شکار ہیں، حکومتی وزراء تین روز سے ن لیگ کی سینئر قیادت سے رابطے کررہے ہیں لیکن ان کی بات سننے میں دلچسپی نہیں ، عمران خان کہاتھا کہ این آر او نہیں دوں گا اب بات چیت کے لیے تیار ہے اور پی ڈی ایم سے این آر او مانگ رہا ہے، کٹھ پتلی کو حکومت جاتے دیکھ کر بات چیت کرنا اور پارلیمنٹ یاد آگئی ہے۔