تحریک انصاف کے جیتنے والے امیدواروں نے کتنے مارجن سے حریفوں کو شکست دی؟

پنجاب کے ضمنی انتخابات میں جیتنے والے 20 امیدواروں کا الیکشن کمیشن نے غیرحتمی اور غیرسرکاری نتیجہ جاری کر دیا ہے

الیکشن کمیشن کی جانب سے غیر حتمی غیر سرکاری نتائج کے مطابق پاکستان تحریک انصاف نے 15 نشستیں جیتیں ہیں جبکہ پاکستان مسلم لیگ ن نے چار اور ایک آزاد امیدوار کامیاب ہوئے ہیں۔ ان ضمنی انتخابات میں مجموعی طور پر 175 امیدواروں نے حصہ لیا تھا۔

پی ٹی آئی نے لاہور کی تین، جھنگ کی دو، فیصل آباد، بھکر، مظفر گڑھ، شیخوپورہ، ملتان، ساہیوال، خوشاب، لودھراں، لیہ اور ڈیرہ غازی خان کی نشستیں جیتی ہیں جبکہ ن لیگ نے لاہور، بہاولنگر راولپنڈی اور مظفر گڑھ سے ایک، ایک سیٹ حاصل کی ہے۔

الیکشن کمیشن کے غیرسرکاری اور غیر حتمی نتائج کے مطابق خوشاب میں پنجاب اسمبلی کے حلقے پی پی 83 سے پاکستان تحریک انصاف کے ملک حسن اسلم خان 48475 ووٹ لے کر کامیاب رہے ہیں۔ ان کے مد مقابل آزاد امیدوار آصف بھا نے 41752 ووٹ حاصل کیے۔ آصف بھا کا تعلق ن لیگ سے تھا تاہم ٹکٹوں کی تقسیم کے معاملے پر وہ پارٹی لیڈرشپ سے ناراض تھے اور اسی وجہ سے انھوں نے آزاد حیثیت میں حصہ لیا تھا۔

بھکر سے تحریک انصاف کے عرفان اللہ خان نیازی 77865 ووٹ لے کر کامیاب قرار پائے ہیں جبکہ مسلم لیگ ن کے سعید اکبر خان نے 66513 ووٹ لے سکے اور یوں انھیں مسلم لیگ کو اس حلقے میں 10 ہزار سے زائد ووٹوں سے شکست ہوئی۔

فیصل آباد میں پی ٹی آئی کے امیدوار علی افضل ساہی 64865 ووٹ لے کر کامیاب ہوئے جبکہ ان کے مدمقابل ن لیگی امیدوار محمد اجمل نے 51631 ووٹ لیے اور وہ دوسرے نمبر پر رہے۔

فیصل آباد میں پی ٹی آئی کے امیدوار علی افضل ساہی 64865 ووٹ لے کر کامیاب ہوئے جبکہ ان کے مدمقابل ن لیگی امیدوار محمد اجمل نے 51631 ووٹ لیے اور وہ دوسرے نمبر پر رہے۔

پاکستان تحریک انصاف کے میاں محمد اعظم پی پی 125 جھنگ کے 82382 ووٹ لے کر کامیابی سمیٹی ہے جبکہ ان کے مدمقابل ن لیگی امیدوار فیصل حیات نے 52178 ووٹ حاصل کیے۔

جھنگ کے ہی دوسرے صوبائی حلقے پی پی 127 سے پی ٹی آئی کے مہر محمد نواز 71248 ووٹ لے کر پہلے نمبر پر رہے جبکہ ن لیگ کے مہر محمد اسلم نے 46724 ووٹوں کے ساتھ دوسرے نمبر پر آئے۔

پی پی 140 شیخوپورہ سے پاکستان تحریک انصاف کے خرم شہزاد ورک نے 50166 ووٹ لیے جبکہ مسلم لیگ ن کے میاں خالد محمود صرف 32105 ووٹ حاصل کر سکے۔

لاہور میں پنجاب اسمبلی کے حلقے پی پی 158 کی نشست پر پی ٹی آئی کے میاں محمد اکرم عثمان جیتے ہیں۔ انھوں نے 36888 ووٹ لیے جبکہ ان کے مدمقابل ن لیگ کے رانا احسن 31447 ووٹ لے سکے۔

لاہور کے حلقے پی پی 167 سے تحریک انصاف کے شبیر احمد نے 40175 ووٹ لیے جبکہ ن لیگ کے نذیر چوہان 26306 ووٹ لے کر دوسرے نمبر پر رہے۔

لاہور کے پی پی 170 سے تحریک انصاف کے ملک ظہیر عباس 24688 ووٹ لے کر کامیاب ہوئے جبکہ پاکستان مسلم لیگ ن کے محمد امین ذوالقرنین نے 17519 ووٹ حاصل کیے۔

پی پی 202 ساہیوال کے حلقے سے پی ٹی آئی کے امیدوار میجر ریٹائرڈ محمد غلام سرور کامیاب ہوئے۔ انھوں نے ن لیگ کے امیدوار ملک نعمان لنگڑیال کو شکست دے دی ہے۔ تحریک انصاف نے اس حلقے سے 61989 ووٹ لیے جبکہ مسلم لیگ ن کے حصے میں 59167 ووٹ آئے۔

ملتان میں پنجاب اسمبلی کے حلقے پی پی 217 میں سابق وزیر خارجہ شاہ محمود قریشی کے بیٹے زین قریشی فاتح رہے۔ انھوں نے 46963 ووٹ لیے جبکہ ن لیگ کے محمد سلمان نعیم 40104 ووٹ لے کر دوسرے نمبر پر رہے۔

پی پی 224 لودھراں سے تحریک انصاف کے محمد عامر اقبال شاہ 69881 ووٹ کے ساتھ کامیاب قرار پائے جبکہ مسلم لیگ ن کے زوار حسین وڑائچ نے 56214 ووٹ حاصل کیے۔

پی پی 272 مظفر گڑھ سے تحریک انصاف کے محمد معظم علی خان 46069 کے ساتھ فاتح رہے جبکہ ن لیگ کی سیدہ زہرہ باسط بخاری نے 36401 ووٹ حاصل کیے۔

پی پی 282 لیہ سے تحریک انصاف کے قیصر عباس خان کامیاب ہوئے، جنھوں نے 43922 ووٹ حاصل کیے جبکہ ن لیگ کے محمد طاہر رندھاوا نے 29726 ووٹ حاصل کیے۔

پی پی 288 ڈی آئی خان سے تحریک انصاف نے کامیابی حاصل کی۔ پی ٹی آئی کے جیتنے والے امیدوار سردارمحمد سیف الدین کھوسہ نے یہاں سے 58885 ووٹ لیے جبکہ ن لیگ کے عبدالقادر خان صرف 32907 ووٹ ہی حاصل کر سکے۔

مسلم لیگ نے کے راولپنڈی کے حلقے پی پی 7 سے جیتنے والے امیداور ملک صغیر احمد ہیں۔ اسی حلقے سے سنہ 2018 کے عام انتخابات میں آزاد امیدوار راجہ صغیر احمد 44 ہزار سے زائد ووٹ لے کر کامیاب ہوئے تھے اور پھر انھوں نے تحریک انصاف میں شمولیت حاصل کر لی تھی۔

بہاولنگر کے حلقہ پی پی 237 سے آزاد امیدوار میاں فدا حسین آزاد حیثیت میں جیتے تھے بعد میں وہ تحریک انصاف میں آئے اور اب ن لیگ کے ٹکٹ پر الیکشن لڑ کر کامیابی حاصل کی۔ یہ ان دس اراکین میں سے ہیں جو 2018 کے انتخابات میں پہلے آزاد حیثیت سے جیتے اور پھر تحریک انصاف میں شامل ہو گئے تھے۔

پنجاب اسمبلی کے ضمنی انتخابات میں پی پی 228 لودھراں سے آزاد امیدوار سید محمد رفیع الدین نے کامیابی سمیٹی۔