چوہدری شجاعت حسین نے حکومت اور اپوزیشن سےجلسوں کی منسوخی کی اپیل کردی

اسلام آباد:پاکستان مسلم لیگ (ق) کے رہنما چوہدری شجاعت حسین نے کہا ہے کہ حکومت اور اپوزیشن سے جلسوں کی منسوخی کی اپیل کردی۔ چوہدری شجاعت نے کہا ہے کہ اگر اس لڑائی میں کوئی مر گیایا کسی کو مروا دیاگیا تو سب پچھتائیں گے ۔

چوہدری شجاعت حسین نے ایک بیان میں کہا کہ پاکستان کے موجودہ نامساعد معاشی اور سیاسی حالات اس خطرناک محاذ آرائی کے متحمل نہیں ہو سکتے، غربت اور مہنگائی کی چکی میں پسنے والے عوام حکومت اور اپوزیشن کے جلسوں اور نمبروں کی سیاست سے سخت پریشان ہیں۔ ق لیگ کےسربراہ نے کہا ہےکہ حیرانگی کی بات یہ ہے کہ اپوزیشن تو جلسوں کی سیاست کرتی ہی ہے مگر اس وقت حکومت بھی اس کے مقابلے میں جلسے کرنے لگی ہے جو حکومت کا کام نہیں ہے، ملک کے اعلیٰ ترین مفاد میں فوراً جلسوں کی منسوخی کا اعلان کیاجائے ۔۔

چوہدری شجاعت حسین نے کہا کہ یہ سیاسی مسابقت ملک میں ایسی افراتفری اور بحران پیدا کر سکتی ہے جس کا فائدہ پاکستان کے دشمنوں کو ہو سکتا ہے، دونوں فریقین اپنے اپنے کارکنان کو اشتعال انگیز سیاست کا راستہ مت دکھائیں، اگر اس لڑائی میں کوئی مر گیایا کسی کو مروا دیاگیا تو سب پچھتائیں گے۔ہار اور جیت کو انا کا مسئلہ بنائے بغیر جمہوری طریقے کے مطابق ووٹنگ میں حصہ لیں۔چوہدری شجاعت کا کہنا تھا کہ ق لیگ نے ہمیشہ ملکی مفاد کی سیاست کی، ہمیں چھوٹی پارٹی کہنے والے بھول گئے ہیں کہ ہم نے ملک اور جمہوریت کی خاطر بڑے فیصلے کیے، دوسروں کی مخالفت مول لینے کے باوجود ہم نے ہمیشہ تدبیر اور صلح جوئی کو ترجیح دی ہے۔