آرمی چیف کا 25 مئی کو یومِ تکریمِ شہداءِ پاکستان منانے کا اعلان

 راولپنڈی : آرمی چیف جنرل سید عاصم منیر نے کہاہے کہ شہداء کی قربانیاں اور غازیوں کی خدمات ہمارا قیمتی اثاثہ ہیں۔ پاک فوج بطور ادارہ اپنے سے منسلک ہر فرد کو اور اس کے لواحقین کو ہمیشہ یاد رکھتا ہے۔25 مئی کو ”یومِ تکریمِ شہداءِ پاکستان ، منایا جائے گا۔فوجی تنصیبات ،یادگاروں اور شہدا ء کی حرمتوں پر حملے انتہائی افسوسناک اور ناقابل برداشت ہیں۔ مضبوط فوج مملکت کی سلامتی اور اتحاد کی ضامن ہے۔

جنرل ہیڈکوارٹرز راولپنڈی میں شہداء اور غازیوں کے اعزاز میں تقسیم اعزازات کی پُروقار تقریب ہوئی جس میں پاک فوج کے سینئر افسران اور شہداء کے اہلخانہ نے شرکت۔آرمی چیف جنرل سید عاصم منیر نے بحیثیت مہمان خصوصی آپریشنز کے دوران بہادری اور قوم کے لیے شاندار خدمات پرپاک فوج کے افسران ،جوانوں اور شہداء کے لواحقین کو فوجی اعزازات سے نوازا۔اس موقع پر خطاب کرتے ہوئے آرمی چیف نے کہاکہ شہداء کی قربانیاں اور غازیوں کی خدمات ہمارا قیمتی اثاثہ اور سرمایہِ افتخار ہیں۔بلاشبہ شہداء کی فرض شناسی اور عظیم قربانیوں کے باعث ہم ایک آزاد فضا میں زندگی بسر کر رہے ہیں۔پاک فوج بطور ادارہ اپنے سے منسلک ہر فرد کو اور اسکے لواحقین کو ہمیشہ یاد رکھتا ہے اور ہمارا یہ رشتہ بطور خاندان قابلِ فخر ہے۔

تقریب میں اکاون افسران کو ستارہ امتیاز(ملٹری) ،بائیس افسران و جوانوں کو تمغہ بسالت اور دو جوانوں کو اقوامِ متحدہ خصوصی میڈل سے نوازا گیا۔۔۔