آرمی چیف کا کور ہیڈ کوارٹرز پشاورکا دورہ، سیکیورٹی صورتحال،بارڈرمینجمنٹ پربریفنگ

آرمی چیف جنرل قمر جاوید باجوہ نے کہا ہے کہ امن اور استحکام کے لیے کوششیں کامیاب ہوں گی، افغانستان میں امن کا مطلب پاکستان میں امن ہے۔ آرمی چیف نے افسران و جوانوں کی قبائلی اضلاع میں امن و استحکام کی کوشش کی تعریف کی ۔

آئی ایس پی آر کے مطابق آرمی چیف جنرل قمر جاوید باجوہ نے کور ہیڈ کوارٹرز پشاور کا دورہ کیا جہاں انہیں سیکیورٹی صورتحال ،بارڈر مینجمنٹ اور  سرحد پر باڑ لگانے کے حوالے سے اقدامات پر بریفنگ دی گئی۔

 اس موقع پر اظہار خیال کرتے ہوئے آرمی چیف جنرل قمر جاوید باجوہ نے کہاکہ امن اور استحکام کے لیے کوششیں کامیاب ہوں گی اوربارڈر منیجمنٹ اقدامات کے دور رس نتائج سامنے آئیں گے ۔ جنرل قمر جاوید باجوہ نے کہاکہ پاکستان افغان امن مذاکرات کی مکمل حمایت کرتا رہے گا، افغانستان میں امن کا مطلب پاکستان میں امن ہے۔آرمی چیف نے دہشت گردی کے خلاف جنگ میں سکیورٹی فورسز اور مقامی لوگوں کی قربانیوں کا تذکرہ کرتے ہوئے کہا کہ علاقے میں دیرپا ءامن و استحکام کیلئے فورسز اور عوام کی قربانیاں لائق تحسین ہیں۔