اسمبلیاں 12 اگست کو تحلیل ہوئیں تو 11اکتوبر تک انتخابات کرا دیں گے،الیکشن کمیشن

الیکشن کمیشن آف پاکستان کا کہنا ہے کہ اسمبلیوں نے 12 اگست کو مدت مکمل کی تو11 اکتوبر تک انتخابات کرا دیں گے لیکن اگر اسمبلیاں پہلے تحلیل ہوئیں تو الیکشن 90 روز میں ہوں گے۔

سیکریٹری الیکشن کمیشن، اسپیشل سیکریٹری اور پولیٹکل فنانس ونگ حکام نے آئندہ عام انتخابات سے متعلق صحافیوں کو بریفنگ میں واضح کیا کہ آئندہ عام انتخابات میں سیاسی جماعتوں اور امیدواروں کی سخت مانیٹرنگ ہوگی جس کے لئے فنانس ایم آئی ایس بنا لیا ہے، جو ایف بی آر، اسٹیٹ بینک، نادرا، ایس ای سی پی اور دیگر اداروں سے معلومات حاصل کرے گا۔انتخابی اخراجات کی حد سے زیادہ خرچ کرنے والے امیدوار و سیاسی جماعت کے خلاف کارروائی کریں گے۔

سیکرٹری الیکشن کمیشن عمر حمید خان نے بتایا کہ الیکشن کمیشن 90 یا 60 روز میں پرانی حلقہ بندیوں پر انتخابات کی تیاری کر چکا ہے، نئی مردم شماری کا نوٹی فکیشن ہوا تو قانون اور آئین کے مطابق فیصلہ کریں گے، مردم شماری کے نوٹی فکیشن سے پہلے نئی مردم شماری پر انتخابات کا سوال نہیں اٹھتا۔

الیکشن کمیشن حکام نے بتایا کہ الیکشن کمیشن مردم شماری 2017ء کے تحت 2022ء میں حلقہ بندیاں کرچکا ہے، اسمبلیوں نے 12 اگست کو مدت مکمل کی تو 11 اکتوبر تک الیکشن کرادیں گے اور اگر اسمبلیاں پہلے تحلیل ہوئیں تو 90 روز میں انتخابات ہوں گے، الیکشن کمیشن حکام کا کہنا تھا کہ تحریک انصاف ممنوعہ فنڈنگ کا معاملہ عدالتوں میں زیرالتواء ہے، پانچوں ہائی کورٹس کے رجسٹرار صاحبان کو جوڈیشل افسران کی بطور ریٹرننگ افسر فراہمی کے لیے خط لکھا ہے تاحال ہائی کورٹس سے جواب موصول نہیں ہوا۔