بجلی کی قیمت میں 6 روپے 10پیسے فی یونٹ اضافے کا امکان

 اسلام آباد:بجلی صارفین کو بڑا جھٹکا لگانے کی تیاری،بجلی کی قیمت میں 6 روپے 10پیسے فی یونٹ اضافے کا امکان ہے۔منظوری کی صورت میں بجلی صارفین پر تقریباً 60 ارب روپے سے زائد کا اضافی بوجھ پڑے گا۔ سی پی پی اے کی درخواست پر نیپرا28 فروری کو سماعت کرے گی

سی پی پی اے کی جانب سے دائر درخواست میں موقف اختیار کیا گیا ہے کہ جنوری میں ہائیڈل سے 5.83 فیصد ،کوئلے سے 33.15 فیصد، فرنس آئل سے 14.07 فیصد جبکہ ڈیزل سے 6.73 فیصد بجلی پیدا کی گئی۔ مقامی گیس سے 14.37 فیصد اور درآمدی ایل این جی سے 7.12 فیصد، جوہری ایندھن سے 14.37 فیصد بجلی پیدا ہوئی۔ ونڈ انرجی سے بھی 2.22 فیصد اور بگاس سے 1.22فیصد بجلی پیدا ہوئی ۔

  سینٹرل پاور پرچیزنگ ایجنسی کے مطابق ڈیزل سے پیدا ہونے والی بجلی کی فی یونٹ لاگت 25 روپے 98 پیسے، فرنس آئل کی 22 روپے 80 پیسے اور ایل این جی سے بجلی کی فی یونٹ پیداواری لاگت 16روپے 70 پیسے فی یونٹ رہی۔ منظوری کی صورت میں بجلی صارفین کو آئندہ ماہ کے بلوں میں اضافی ادائیگیاں کرنا ہوں گی۔