ایف بی آر کا نان فائلر سوشل میڈیا انفلوئنسرز کے خلاف بڑے کریک ڈاؤن کا فیصلہ

ایف بی آر نے نان فائلرز سوشل میڈیا انفلوئنسرز کے خلاف سخت اقدامات کا فیصلہ کر لیا ہے۔ ذرائع کے مطابق 30 ستمبر تک انکم ٹیکس ریٹرن جمع کرانے والوں کی فہرست مکمل کر لی جائے گی جس کے بعد اکتوبر سے بڑے پیمانے پر کارروائیوں کا آغاز ہوگا۔

دولت کی نمائش کرنے والے نشانے پر

ذرائع کا کہنا ہے کہ دولت کی نمائش کرنے والے انفلوئنسرز اور شوبز شخصیات جو نان فائلرز ہیں، ان کا مکمل ڈیٹا نادرا سے حاصل کر لیا گیا ہے۔ ان میں بینک اکاؤنٹس، اخراجات، بیرون ملک سفر، کریڈٹ اور اے ٹی ایم کارڈ کی تفصیلات شامل ہیں۔

ایف بی آر کی نگرانی

ایف بی آر خصوصی مانیٹرنگ کے ذریعے سوشل میڈیا پر وائرل ہونے والے اسٹارز کی سرگرمیوں پر نظر رکھے گا۔ وہ افراد جو مہنگی گاڑیوں، قیمتی گھروں، برانڈڈ کپڑوں اور زیورات کی نمائش کرتے ہیں، ان کے خلاف سخت کارروائی متوقع ہے۔

شوبز اور انفلوئنسرز زیرِ نظر

ذرائع کے مطابق شوبز انڈسٹری اور سوشل میڈیا سے وابستہ بااثر شخصیات جو اب تک ٹیکس نیٹ میں شامل نہیں ہوئیں، ایف بی آر کی ریڈار پر ہیں۔ حکام کا مقصد قومی خزانے میں ٹیکس کی وصولی کو یقینی بنانا ہے اور کسی کو استثنیٰ نہیں دیا جائے گا۔