نیب دفتر کے باہر ہنگامہ، پتھراؤ: لیگی رہنماؤں وکارکنوں کیخلاف مقدمہ درج کرانے کا فیصلہ

لاہور/ اسلام آباد: قومی احتساب بیورو (نیب) نے مریم نواز کی پیشی کے وقت کارکنان اور پولیس کے درمیان تصادم پر (ن) لیگی رہنماوَں اور کارکنان کے خلاف مقدمہ درج کرانے کا فیصلہ کیا ہے۔

نیب کی جانب سے جاری اعلامیے میں کہا گیا ہے کہ قومی احتساب بیورو (نیب) کے لاہور دفتر میں آج مریم نواز کو ذاتی حیثیت میں طلب کیا گیا تھا تاہم ان کی جانب سے نیب لاہور میں پیش ہوکر جواب دینے کی بجائے کارکنان کے ذریعے منظم انداز میں غنڈہ گردی، پتھراؤ اور بدنظمی کا مظاہرہ کیا گیا۔

نیب کے 20 سالہ دور میں پہلی مرتبہ ایک آئینی و قومی ادارے کے ساتھ اس نوعیت کا برتاؤ روا رکھا گیا ہے، نیب دفتر کی عمارت پر پتھراؤ کرتے ہوئے کھڑکیوں کے شیشے توڑنے کے علاوہ نیب کے عملہ کو بھی زخمی کیا گیا۔ان حالات میں نیب کی جانب سے مریم نواز کی پیشی کو فوری طور پر منسوخ کرنے کے علاوہ کوئی چارہ کار نہیں تھا۔

نیب کے اعلامیے کے مطابق مسلم لیگ (ن) کے عہدیداروں اور دیگر شرپسند عناصر کی جانب سے منظم انداز میں قانونی کارروائی میں مداخلت کی تحقیقات کا فیصلہ کیا ہے۔ مزید برآں نیب نے (ن) لیگ کے رہنماؤں و کارکنان کے غیر قانونی اقدام اور کارسرکار میں مداخلت کا مقدمہ درج کروانے کا فیصلہ کیا ہے۔

اعلامیے میں کہا گیا ہے کہ قومی احتساب بیورو ایک قومی ادارہ ہے جس کی تمام تر وابستگیاں ملک و قوم کے ساتھ ہیں۔ نیب کا کسی سیاسی جماعت و گروہ سے کوئی تعلق نہیں جب کہ نیب کے تمام تر اقدامات آئین و قانون کی روشنی میں سر انجام دیتا ہے۔ نیب میں پیشی کے لئے آنے والے تمام افراد کو قانون کا احترام کرنا چاہیے کیونکہ نیب میں ذاتی حیثیت میں پیشی کے لئے بلانے کا مقصد قانون کے مطابق کسی بھی شخص کا موقف معلوم کرنا ہوتا ہے۔

نیب افسران قانون کے مطابق نیب میں پیشی کیلئے آنیوالے ہرشخص کی عزت و احترام کو یقینی بنانے پر یقین رکھتے ہیں مگر کسی دباؤ، دھمکی، شرانگیزی یا غنڈہ گردی کی پرواہ کئے بغیر اپنے قومی فرائص سرانجام دیتے رہیں گے کیونکہ نیب کا ایمان کرپشن فری پاکستان ہے۔