پی ٹی آئی تقسیم۔۔ جہانگیرترین گروپ کی پنجاب کے بعد خیبرپختونخوا میں بھی انٹری

حکمران جماعت پاکستان تحریک انصاف میں فارورڈ بلاک بنانے کے باضابطہ اعلان کے بعد جہانگیرترین ہم خیال گروپ نے خیبرپختونخوا میں بھی انٹری دے دی ہے، کے پی کے سے پانچ اراکین قومی اسمبلی کی حمایت حاصل کرلی۔

جہانگیر ترین ہم خیال گروپ نے پنجاب کے بعد اب خیبر پختونخوا میں بھی ارکان قومی اسمبلی کی حمایت حاصل کرنے کے لیے ٹاسک ملنے کے بعد راجا ریاض کا کہنا ہے کہ ہم خیال گروپ کو خیبرپختونخوا سے 5 ارکان قومی اسمبلی کی حمایت حاصل ہوگئی ہے تاہم ان کے نام وقت آنے پر ہی بتائیں گے، اس کے علاوہ مزید ایم این ایز سے بھی رابطے میں ہیں۔ نجی ٹی وی چینل سے بات کرتے ہوئے انہوں نے کہا کہ خیبرپختونخوا اسمبلی میں گروپ کی فی الوقت ضرورت نہیں تاہم وقت پڑنے پر خیبرپختونخوا اسمبلی میں بھی گروپ بناسکتے ہیں۔

خیال رہے کہ گزشتہ رات لاہور میں جہانگیر ترین کی جانب اپنے حامی ارکان پنجاب و قومی اسمبلی کے اعزاز میں عشائیہ دیا تھا جہاں پی ٹی آئی میں ہی جہانگیر ترین ہم خیال گروپ کے باضابطہ قیام کا اعلان کیا گیا۔ راجا ریاض کو قومی اسمبلی میں گروپ کا پارلیمانی رہنما بنایا گیا ہے جبکہ پنجاب اسمبلی میں سعید اکبر جہانگیرترین ہم خیال گروپ کی سربراہی کریں گے۔ یہ گروپ پنجاب اسمبلی کے رواں اجلاس میں جمعہ کو پاور شو کرے گا۔

پنجاب کے صوبائی وزیر نعمان لنگڑیال نے منگل کو لاہور میں میڈیا سے بات کرتے ہوئے کہا کہ پی ٹی آئی میں نئے گروپ کا نام جہانگیر ترین ہم خیال گروپ رکھا گیا ہے، آج  کے اجلاس میں 31 ارکان اسمبلی نے شرکت کی، انکا کہناتھا کہ جہانگیر ترین کے ساتھ غلط ہوا اسی لیے ان کا ساتھ دے رہے ہیں، ہمیں وزیراعظم عمران خان پر اعتماد ہے لیکن ہم اپنے ایجنڈے پر متفق ہیں، ہم جہانگیر ترین کی پیشی پر ان کے ساتھ جائیں گے۔