کسی بھی قسم کے نقصان کے پیش نظر تحریک انصاف سے مالی ضمانت لی جائے ،آئی جی اسلام آباد

اسلام آباد:پی ٹی آئی لانگ مارچ اور احتجاج کے حوالے سے آئی جی اسلام آباد نے رپورٹ اسلام آباد ہائی کورٹ میں جمع کروادی ، رپورٹ میں کہا گیاہے کہ کسی بھی قسم کے نقصان کے پیش نظر تحریک انصاف سے مالی ضمانت لی جائے۔ مطلوبہ شرائط کے مطابق احتجاج ہوا تو سکیورٹی دینے کو تیار ہیں۔سپریم کورٹ واضح کر چکی ہے اجتماع کی اجازت جمہوری حق کے طور پر دی جاتی ہےلیکن اجتماع قانونی حکومت کو ختم گرانے کے لیے نہیں ہو سکتا۔عمران خان کو لاحق خطرات سے متعلق تھریٹ الرٹس بھی رپورٹ میں شامل کی گئی ہے۔

 آئی جی اسلام آباد نے رپورٹ میں کہاکہ پی ٹی آئی25 مئی کو بھی اپنی یقین دہانی کی خلاف ورزی کرچکی ہے، پی ٹی آئی کے ایک رہنما نے وزیر داخلہ کو جان کی دھمکی بھی دی۔ ویڈیوز بھی موجود ہیں جن میں کارکنوں کو غلیلیں دی جارہی ہیں جب کہ شیخ رشید اور فیصل واوڈا کہہ چکے ہیں کہ یہ خونی مارچ ہو گا۔ خود چیئرمین پی ٹی آئی عمران خان بھی تسلیم کر چکے ہیں کہ ان کے کچھ لوگ مسلح ہیں۔ پی ٹی آئی مطلوبہ ضمانت دے تو کنٹینرز بھی رکھنے کی ضرورت نہیں ہو گی، تحریک انصاف کو عدالتی فیصلوں کے مطابق ہی احتجاج کی اجازت دی جائے۔ مطلوبہ شرائط کے مطابق احتجاج ہوا تو سکیورٹی دینے کو تیار ہیں۔

رپورٹ کے مطابق سپریم کورٹ واضح کر چکی ہے کہ اجتماع کی اجازت جمہوری حق کے طور پر دی جاتی ہے لیکن اجتماع قانونی حکومت کو ختم گرانے کے لیے نہیں ہو سکتا۔ احتجاج سے ڈپلومیٹک موومنٹ بھی بند ہو جاتی ہے۔آئی جی اسلام آباد کی جانب سے درخواست کی گئی کہ ائیرپورٹ تک جانے والے راستوں پر وفاقی ایجنسیز کو اختیار دیا جائے۔