اسلام آباد ہائی کورٹ :بیٹی کا شناخت کارڈ بلاک کرانے پر والد ، نادرا کو5،5 لاکھ روپے جرمانہ

اسلام آباد ہائیکورٹ نے نادرا کی جانب سے خاتون شہری عروج تابانی کا شناختی کارڈ بلاک کرنا غیر قانونی قرار دے دیا۔ عدالت نے فیصلہ سناتے ہوئے نادرا اور خاتون کے والد پر 5 ،5لاکھ روپے ہرجانہ عائد کرتے ہوئے قرار دیا کہ خاندانی جھگڑے پر نادار کی جانب سے شناختی کارڈ بلاک کرنا غیر قانونی ہے۔

ایک شہری یعقوب تابانی نے عروج تابانی کو اپنی بیٹی ماننے سے انکار کرتے ہوئے نادرا سے کہہ کر شناختی کارڈ بھی بلاک کرا دیاتھا ۔عروج تابانی نے اقدام کے خلاف اسلام آباد ہائی کورٹ میں درخواست دائر کی جس پر چیف جسٹس اطہر من اللہ نے محفوظ فیصلہ سنایا۔

اسلام آباد ہائیکورٹ نے فیصلہ دیا کہ عروج تابانی کو شناختی کارڈ بلاک ہونے پر اذیت اور کرب سے گزرنا پڑا، نادرا کے پاس کوئی اختیار نہیں کہ وہ خاندانی جھگڑوں میں مداخلت کرے، نادرا اور یعقوب تابانی 30 دن کے اندر پانچ پانچ لاکھ روپے عدالت میں جمع کرائیں، ہرجانے کی رقم عدالتی کارروائی کے اخراجات کی مد میں عروج تابانی کو دی جائے گی ۔