سازش کے خلاف خود کو،،نیوٹرل،،کہنے والوں نے بھی کچھ نہیں کیا،عمران خان

مردان :پاکستان تحریک انصاف کے چیئرمین عمران خان نے کہا ہے کہ اگر انتخابات کی تاریخ نہیں دی تو اسلام آباد آںے والا سمندر سب کو بہا لے جائے گا، عوام فیصلہ کریں کہ پاکستان کی قیادت کون کرے گا۔ 

مردان میں عوامی جلسے سے خطاب کرتے ہوئے عمران خان نے کہا کہ حقیقی آزادی کی جدوجہد میں شرکت کے لیے آپ کو آنا ہوگا، میں سیاست کے لیے نہیں بلکہ انقلاب کے لیے بلارہا ہوں، جو بھی 70 سال سے کم عمر ہے وہ نوجوان ہے، جب اسلام آباد آنا ہے تو اپنے خوف کی زنجیریں توڑ کر آنا۔

 عمران خان نے کہا کہ سازش کرنے والے ایک ، ایک میر جعفر کی شکل میرے دل پر نقش ہے، شوکت ترین کو ان لوگوں کے پاس بھیجا جو خود کو نیوٹرل کہتے ہیں کہ انہیں جاکر بتاو کہ اگر ساز ش کامیاب ہوئی تو معیشیت تباہ ہوجائے گی لیکن افسوس انہوں نے بھی کچھ نہیں کیا۔

عمران خان نے کہا کہ موجودہ چیف الیکشن کمشنر کی موجودگی میں انتخابات صاف و شفاف نہیں ہوسکتے، الیکشن کمیشن کو ’تمام لوٹوں‘ کے بارے میں علم ہے، یہ قانونی مسئلہ نہیں بلکہ اخلاقات کا مسئلہ ہے، اگر الیکشن کمیشن نے لوٹوں‘ کو بچایا تو عوام انہیں بھی معاف نہیں کرے گی۔ عوام فیصلہ کرے گی کہ ان کی قیادت کون کرے گا۔

عمران خان نے کہا کہ ڈونلڈ لو نے ہمارے سفیر کو کہا کہ اگر عمران خان کو ہٹا دیا تو پاکستان معاف کردیں گے، کیا ہم امریکیوں کے غلام ہیں، ہم ان کے نوکر ہیں؟ ہم ان کے نوکر اور غلام نہیں ہیں، ملک کی قیادت کون کرے گا فیصلہ کوئی مفرور نہیں بلکہ عوام کریں گے۔ میرے لیے سب سے شرمندگی کی بات یہ تھی کہ میں نے بیرون ملک جاکر چین، سعودی عرب سمیت دیگر ممالک سے قرضے مانگے، جو قوم قرضے مانگتی ہے اُس کی کوئی عزت نہیں ہوتی، مجھے معلوم ہے کس کس نے سازش کی۔

سابق وزیر اعظم نے کہا کہ ہمارے خلاف مہم چلائی گئی اور اس مہم میں کس کس میڈیا ہاؤس کو پیسا دیا گیا اس بارے میں ساری معلومات ہیں، اب میڈیا کے نمائندے عوام سے مہنگائی سے متعلق سوال کیوں نہیں کرتے جیسا کہ وہ ہماری حکومت کے دوران کرتے تھے۔ سپریم کورٹ کے چیف جسٹس اس سازش کی کھلی تحقیقات کرائیں۔

سابق وزیر اعظم نے مسلم لیگ (ن) اور پیپلز پارٹی کے قائدین پر کڑی تنقید کرتے ہوئے کہا کہ شہباز شریف اور آصف علی زرداری امریکا کے غلام ہیں اور نواز شریف سے زیادہ بزدل آدمی زندگی میں نہیں دیکھا، ، بلاول امریکا جا کر پیسے مانگے گا کہ ہماری مدد کر دیں ورنہ عمران خان واپس آجائےگا۔بلاول میں اتنی جرات نہیں کہ روس سے سستا تیل لے سکے ۔ فضل الرحمان کو مولانا نہیں کہوں گا کیونکہ میں علماء کی بہت عزت کرتا ہوں، فضل الرحمان نے حکومت میں آکر این ایچ اے کی وزارت حاصل کی۔ حمزہ شہباز نے ڈاکٹر رضوان کو دھمکیاں دیں ، اس پر اتنا دباو ڈالا کہ وہ ہارٹ اٹیک سے مر گیا، ایم کیو ایم نے کراچی میں پولیس افسران کو چن چن کرقتل کیا۔