وزیراعظم عمران خان کا بل گیٹس میں رابطہ، انسداد پولیوکیلئے پاکستان سے تعاون پر شکریہ

وزیراعطم عمران خان نے مائیکروسافٹ کے بانی اوربین الاقوامی رفاہی ادارے بل اینڈ ملینڈا گیٹس کے سربراہ بل گیٹس سے ٹیلیفونک رابطہ کیا جس میں پولیو کیسز میں کمی اور عوامی صحت سے متعلق دیگر امور پر تبادلہ خیال کیا گیا۔

وزیراعظم نے بل گیٹس کو پاکستان میں انسداد پولیو مہم اور کورونا چیلنجز سے نمٹنے کیلئے حکومتی اقدامات سے بھی آگاہ کیا۔وزیر اعظم ہاؤس کی جانب سے جاری اعلامیہ میں کہا گیا ہے کہ وزیراعظم نے بل کیٹس فاونڈیشن کی پسماندہ لوگوں کی معاشی ترقی کے اقدامات کو سراہا۔

وزیراعظم عمران خان نے کہا کہ پولیو کا خاتمہ ہماری ترجیحات میں شامل ہے۔کورونا وبا میں بھی انسداد پولیو مہم زور و شور سے جاری ہے۔ رواں سال پولیو مہم میں 3 کروڑ 30 لاکھ بچوں کو پولیو کے قطرے پلائے گئے۔وزیراعظم عمران خان نے انسداد پولیو کےلئے پاکستان کیساتھ تعاون پر شکریہ ادا کیا۔